Serchhip leh Lawngtlai MJA-in inkhawmpui an hmang

Mizoram Journalists' Association (MJA), Serchhip leh Lawngtlai district chuan nimin khan khawmpui an hmang a; Serchhipah chuan district bawrhsap Paul L Khuma'n hmanpuiin, Lawngtlaiah chuan LADC chief executive member C Lalmuanthanga'n a hmanpui.

Serchhip Press Club-a MJA khawmpuiah hian bawrhsap Paul L Khuma chuan, tunlai khawvelah electronic device leh social media revolution a thleng mek tih sawiin, "He thil thar hi thinhrik mai loa hmang ṭangkai thiam a pawimawh. Khawvel changkang zel mila inherrem thiam mi nih tum ula, awn lam nei loin thu ziak ṭhin ang che u," a ti a, an thuziahte a chhiartu mipui tana ṭangkai zawkna tura a tawp thlenga chhuizui peih ṭhin turin thuthar thehdarhtute a chah.

Khualzahawm Lalnunmawii, district information officer pawhin thu sawiin, information dik leh belhchian dawl pekchhuah chu journalist-te mawhphurhna a nih thu a sawi a, "Mipui sorkar (democracy)-ah chuan ram hruaitute khalh ngiltu pawimawh tak inni tih inhriin, taimak chhuah lehzual ang che u," a ti.

Serchhip District MJA Annual Conference hi vice president Kapliana Pachuau-in a kaihruai a; president C Lalhminghlua'n thu a sawi bakah, tunhnaia an member pension RC Hranghmingthanga (Zawlbuk Aw), Thenzawl hnenah thlahna thuziak a hlan a ni. MJA Gen. Hqrs. aṭangin vice president Lal-hmachhuana leh secretary Samuel Lalruat-sangate'n an hmanpui.

Lawngtlai Press Club-a MJA khawmpuiah chuan resolution pakhat - 'Lawngtlai district-a raltlan leh ṭhenawm rama bungrua lut leh chhuak hi mipui himna thui zawk thlir chungin awmze nei zawkin kalpui ni rawh se' tih an pawm a, chak taka bawhzui an rel a ni.

Khuallian C Lalmuanthanga chuan, journalist-te chu sorkar thu leh hla mipui hnena puangzartu an nih angin thu dik leh belhchian tlak chauh thehdarh turin a chah a, "Thuthar thehdarhtute in nih angin remna piah lamah indona hial thlen theitu in ni a, rilru fim takin hna thawk fo ang che u," a ti a, MJA Lawngtlai member-te chu advertisement, pension leh press tour ṭha leh changtlung zawk siam turin theihtawp a chhuahpui zel dawn tih a sawi.

MJA Gen. Hqrs. general secretary K Zothanpara chuan, MJA member-te inkara thawhhona ṭha awm mek chu vawng nung zel turin kalkhawmte a chah a, "Social media chak tak karah chanchinbu hlutna kaitho thar turin theihtawp chhuah a ṭul. Ram leh hnam tana in hnathawh kawngah MJA, Lawngtlai district-te in chhuanawm takzet a, hma lam hunah pawh ṭhahnemngai takin thawk zel ang che u," a ti.

Lawnglai MJA president Elvis Lathanzuala pawhin thu a sawi a, chawhma lamah rorel niin, LADC IPRO C Lawmsangzuala bakah MJA General Headquarters aṭangin secretary Lalchhandama leh member Lal Rinmawiate'n an hmanpui.