Mipui inthlahdah vanga puhna Sawifiah turin BJP-in sorkar an phût

BJP Mizoram Pradesh chuan thuchhuah siamin, Mizorama Covid-19 darh nasat tâk chhanah sorkarin mipui inthlahdah vanga a puh chu sawifiah turin Mizoram sorkar leh Health Minister an phût.

BJP chuan, tun hnaia Health minister Dr R Lalthangliana hoa, 'CCC kaihhnawih thil pawimawh chi hrang hrang ngaihtuaha ṭhutkhawm a ni,' tih thupui hmanga sorkar thuchhuahah, 'Covid-19 positive tharte an chhui chiannaa case tam ber chu mipuite kan inthlahdul deuh vang,' tia tarlan a nih thu an sawi a, "Covid-19 vei tam chhan leh darh chhana mipui min puh mai hi BJP chuan a pawi kan ti a, vanduaithlak kan ti hle. Dr R Lalthangliana chuan a sawi loh tawp tur a sawi a ni," an ti.

Mahni mawhphurna zawh loh vanga mawhpuh tur zawng lo a, a hna a tlin lo a nih chuan mi dang kian mai turin Mizoram BJP chuan Health Minister an ngen a ni.

MNF sorkar leh State Election Commission-te'n anmahni hmakhua ngaih vangin VC/LC inthlan buatsaih a ni tih sawiin BJP chuan, "Mipui hmangaihna tel miah loin fimkhurna dan min bawhchhiattir a ni," an ti.