Ruihhlo dona ni hman a ni

Nimin kha ruihhlo dona ni, International Day against Drug Abuse and Illicit Trafficking a ni a; he ni pual hian Social Welfare department buatsaihin Vanapa Hall-ah inkhawm neih niin, Home minister R Lalzirliana khuallian a ni.

Lalzirliana chuan, ruihhlo hmansual laka inven a pawi­mawh tih sawiin, "Ruih­hlo vanga harsatna tâwk mekte mumal tak leh kawng hmang nei taka enkawl zui a ṭul tak zet a. Sorkar, kohhran, YMA leh tlawmngai pawl hrang hrang pawhin nasa takin hma an la mek zel a, ṭanho a ṭul tak meuh a ni," a ti.

Home Minister sawi danin, Mizoramah kum 1984-ah heroin overdose vanga thi an awm ṭan a, kum 1989 aṭangin spasmo-proxyvon vanga thi an awm ṭan. Kum 2015 thlengin ruihlo hrang hrang hmansual vangin mi 1,300 chuang an thi tawh a ni.

Khualzahawm, Social Welfare minister PC Lalthanliana chuan, "Ruihhlo hman sual leh mihring inrûkbo chungchang kan zirnaah hian tunlai zirlai leh ṭhangthar hote hi a dotu pawl kan nih tih inhria ila. Sorkar, pawl, kohhran leh vantlanga do mai a tawk lo a, mimalin kan do ṭheuh a pawimawh. Heng sualte hi kan kawngka bulah an bawk reng a, in chhungah zuan luh an tum reng a, lo do tur hian ram pumah ke pên tur leh harh thar a pawimawh," a ti.

Inkhawm hi parlia­mentary secretary (Social Welfare) K Lalrinthanga'n a kaihruai a; CID (Crime) SP Lallianmawia'n 'Prevention of Drugs Traf­ficking in Mizoram' tih thupui hmangin Mizorama ruihhlo lo luh dan leh ven dan tur a sawi.

International Day against Drug Abuse and Illicit Trafficking pual hian Lungleiah chuan 162 Bn. Border Security Force buatsaihin BSF sipai 120 leh zirlaite'n kawng an zawh. Tlaiah 162 BSF-te'n Zotlanga an hmunpuiah ‘Awareness Campaign on Drug Abuse & Illicit Trafficking’ an buatsaih a, DIG (SR) Joseph Lalchhuana'n a hmanpui a ni.