Larsapin Champhai leh a chhhehvel a tlawh Sorkar official leh sipai thuneitute a kawm

Governor Lt.Gen. Nirbhay Sharma chuan June 25, 2015 khan Cham­phai a tlawh a; Circuit House-ah Champhai DC leh SP-te bakah, Assam Rifles, BRTF hotute leh sorkar department hotute a kâwm.

Larsap chuan, Champhai chu ramri depa awm a nih avangin Mizoram hmasawnna leh ṭhan zelna atan hmun pawimawh a nih thu a sawi a, “A pianṭo-ah a mawi sa avang­in khualzin mite hîp thei tura ruahmanna siam a pawimawh. Mi tam takte eizawnna kawngka inhawn theihna a ni,” a ti.

Nirbhay Sharma chuan, Champhai district chu buhbâl chìnna hmun an neih ṭhat thu sawiin, “Hmunhma ṭhat ang aiin thar chhuah a beitham deuhin ka hria,” a ti a; tunlai thiamna hmanga nasa zawka ṭan lak a nih theih chuan intodelhna tham thar chhuah theih a beisei thu a sawi.

Hmarchhak state dang­te nen khaikhinin Mizoram chu hmun sang tak thleng thei turin malsawmna tam tak a dawn thu sawiin, Larsap chuan, “Mizoramin theihna a neih­te a taka chantir tur chuan ṭanrual a pawimawh. Sor­kar hmalaknaa kohhran leh tlawmngai pawl nena thawhhona ṭha neih a ṭul,” a ti.

Governor hian nimin khan Zokhawthara Land Custom Station, 10th Assam Rifles hmunhma leh Rihdil-te a tlawh a ni.