Mizoramin faina lama hmalakna tur Cheng nuai 1491.75 a dawng

PHE leh UD&PA minister Zodintluanga chuan nimin khan New Delhi-ah sorkar laipuia Drinking Water & Sanitation minister Chaudhary Birender Singh chu a pisaah a kâwm. Union Minister hian Mizorama thianghlimna lama hmalakna turin cheng nuai 1,491.75 hû sanction order a lo hlan.

Zodintluanga hian Birender Singh chu Mizoramin project hrang hrang a neihte leh Mizoram harsatna hrang hrangte a sawipui a; Swachh Bharat Mission (Gramin) hnuaia Mizorama hmalakna turin cheng nuai 332.31 leh National Rural Drinking Water Programme (NRDWP) hnuaiah nuai 1159.44 sanction order a lo pe a ni.

UD&PA minister chuan, Chaudhary Birender Singh chu Mizoram tlawha zin tur leh, Mizoram hmasawnna leh harsatnate a hmuna enpui turin a sáwm a; Union Minister chuan remchang hmasa berah Mizorama zin a tum thu a sawi.

Chaudhary Birender Singh hi Panchayati Raj Ministry enkawltu a nih bawk avangin UD&PA Minister chuan Mizorama village council-te'n Finance Commission ṭanpuina an dawn ve tawh loh avangin V/C enkawl kawngah harsatna an tawh mek thu a hrilh.

Zodintluanga hian vawiinah DoNER minister Dr Jitendra Singh hmuh a tum a, Mizoram project hrang hrangte a sawipui ang.

Minister hi UD&PA secretary Dr C Vanlalramsanga, Delhi Mizoram House resident commissioner Ranbir Singh leh SIPMIU project director Valbuanga ten an ṭawiawm a ni.