Serkhan-Bagha kawng Sorkarin zangnadawmna vbc. 12.5 a bá Khaw ṭhenkhat High Court-ah an zualko

Serkhan-Bagha kawngpui zauhna atana ram lâknaa zang­nadawmna pek turah Mizoram sorkarin cheng vbc. 12.5 a bá. PWD chuan zangnadawmna chungchang hi sorkarah thlen an tum mek. Mi ṭhenkhat chu Court-ah an zualko.

Ram neitu court-a kal mi ṭhen­khatte ukil, Lalsawirema'n Vanglaini zawhna chhanga a sawi danin, zangnadawmna hmu tura tihte chu Mizoram sorkarin May 21, 2015-ah a pawm. Zangnadawmna la turte chu - Lungdaiah mi pariat, Serkhanah mi 62, Nisapuiah mi 116, Lungmuatah mi 84, North Chaltlangah mi 88, Bukpuiah mi 136, Thingthelhah mi 85, North Hlimenah mi 132, Saipumah mi 125 leh Saiphaiah mi 114 an ni.

Zangnadawmna an dawn lawk loh avangin khaw ṭhenkhat chuan High Court-ah sorkar an khing tih sawiin, "Bukpui khaw bikah High Court-in thutlukna a siam tawh. Mizoram sorkar chu zangnadawmna tura chhût chhuah bakah, a pung nen pe nghal turin a hriattir. An pek har leh a pung a tam dawn tihna a ni," a ti. Bukpuiah hian chhungkaw 136-in zangnadawmna an dawn tur chu Rs. 2,52,21,536 a ni.

Vanglaini palai zawhna chhangin PWD hotute chuan, Serkhan-Bagha kawng zauhnaa zangnadawmna chungchang hi sorkarah thlen an tum mek tih Ningani khan an sawi.

PWD hotute sawi danin, Serkhan-Bagha kawng atan hian sum tumtu North Eastern Council chuan zangnadawmna tur ruahman tel a phal lo a, Mizoram sorkar tum turin an ruahman. Mahse an tihsual avangin zangnadawmna turin cheng nuai 80 vel an pe a ni. Project-ah zangnadawmna ruahman tel a nih loh avangin PWD chuan sorkar thlen bak tih theih an nei lo.

Ram neitute'n zangnadawmna an hmuh loh avangin an ramah hna thawh an phal lo a, hei vang hian tun dinhmunah chuan kawng siam hna thawh theih mumal a awm loh thu PWD hotute chuan an sawi.

Kawng siamna atana pawisa ruahman aṭangin 48% pek chhuah a ni tawh a, hna 55% vel thawh zawh tawh a ni.