DMR Minister-in lei tlahniam a enfiah Tlahniam tawh lo tura siam theih beisei

Disaster Management & Rehabilitation (DMR) minister C Ngunlianchunga chuan, nimin khan Hunthar Venga lei tla­hniam a enfiah a; lei tlahniam ṭhin chu nakkum fûrah chuan tlahniam tawh lo tura siamṭhat a nih a beisei thu a sawi.

DMR Minister chuan Hunthar Venga lei tlahniam chu a reh theihna atan DMR department-in theihtawp a chhuah tih a sawi a, "Concept paper kan buatsaih a, Central-ah kan thawn tawh. Nakkum fûr hunah chuan a tlakhniam tawh loh kan beisei. Mahse, kan thu a nih loh avangin sawi lâwk theih a ni lo a, theihtawp erawh kan chhuah a ni," a ti.

C Ngunlianchunga sawi dan­in, Delhi-a chám mek Chief Minister lo haw hunah an thil hmuh dante an sawipui ang a, lei tlahniam veng tura tuna tih theih ang ang DMR-in tih a tum a ni.

Hunthar Veng khawtlang hruaitute chuan lei tlahniamah hian leivung an paih nasat ṭhin thu an sawi a; chumi chungchangah chuan Aizawl DC Dr Franklin Laltinkhuma'n leivung paih ṭhinte chu chhinchhiah a, report thehlut ṭhin turin a chah.

C Ngunlianchunga hi DMR director C Lalpeksanga, Aizawl DC, Traffic SP C Lalthanmawia bakah, DMR, Aizawl Municipal Council leh Geology & Minieral Resource department-a mithiamte'n an ṭawiawm a ni.