KHAWTHLIR

Nimin zing dar 5 leh tlai dar 5 inkar khan Mizorama lut turte swab sample Rapid Antigen Test hmangin endik a ni a; Covid-19 vei Vairengte checkgate-ah mi paruk leh Bairabi-ah mi pakhat hnam dang driver/handyman vek hmuh chhuah a ni. Hripui vei hmuh chhuahte hian an state-a inenkawl an duh zawk avangin thawn let dan tur ngaihtuah a nih thu, Kolasib aṭanga dawn a ni. Vairengte-ah hian Covid-19 vei mi 136 hmuh chhuah a ni tawh.

Tuichawng bialtu MLA Dr BD Chakma chuan nimin khan a MLA fund aṭangin Covid-19 dona atan Chief Minister’s Relief Fund-ah Rs. 25,00,000 a chhûng lut. Nimin thleng khan Covid-19 dona atan CMRF-ah cheng vbc. 21.26 a lut tawh a ni.

Champhaia police, AH & Vety department leh Environment, Forest & Climate Change department-te chuan nimin khan North Diltlang khua aṭanga Champhai pana dan loa vawk phurhte chu Ngúr khaw dáiah an man. Vawk neitu R Lalhruaitluanga (36) s/o R Lalengmawia, Champhai Vengthlang North leh lirthei khalhtu Lalrosanga (26) s/o Robula, North Diltlangte pawh an man a, Champhai Police Station-ah thubuai ziah luh a ni.

Solid Waste Manage­ment Centre, Dihmun­tlang sak zawh a nih huna hman dan tur inkaihhruaina zirchianna hun nimin khan Kolasib IPR conference hall-ah Kolasib Town Sanitation Task Force leh Kolasib Town Village Council 17-te tan buatsaih a ni a, bawrhsap Dr H Lalthlangliana’n a hmanpui. He hunah hian Kolasib DAO J Rothanga’n bawlhhlawh ṭawih theite sâwngbawl dan leh leiṭha atana siam dan a sawifiah.

Lawngtlai bawrhsap Dr Andrew H Vanlaldika hoin nimin khan DC conference hall-ah Lawngtlai district-in auto-rickshaw leh taxi hman man bithliah thar tur an sawiho a, rawtna an siam chu State Transport Authority-ah an la thlen leh ang. Ṭhutkhawmah hian sorkar official-te bakah, Lawngtlai Auto Rickshaw Owners’ & Drivers’ Association, Mizoram Govt. Drivers’ Association leh pawl dang aiawhte an tel a ni.