News Lawrkhawm

NLUP sem
Horticulture department chuan nimin khan Saiha division chhunga NLUP dawng turte hnenah ṭan­puina an sem. Nimina NLUP ṭanpuina sem zawng zawng chu Rs. 6,94,048 a ni. Lawngtlaiah pawh nimin vek khan AH&Vety department hnuaia vawk vulh thlangtu chhungkaw 126 hnenah vawktê pali ṭheuh leh a chaw man tur Rs. 35,950 ṭheuh pek a ni bawk.

AIDS sawiho
Aizawl District AIDS Prevention & Control Committee chu nimin khan Aizawl DC pisaah an ṭhukhawm a; HIV/AIDS veite enkawl kawnga ṭan lak zel dan tur an sawiho. Meeting-ah hian Aizawl district-ah HIV hrik pâi mi 6,209 an awm thu leh chu'ng zinga mi 2,803 chuan inenkawlna an lak mek thu tarlan a ni.

Inkâp hlum
Lalhriatchhunga (38), Tualte khua chuan Mal­sawmdawngtluanga (36) s/o Tlanghluna, Tualte chu June 25, 2015 tlai dar 6:30 vel khan ramsa nia ngaiin a kâp palh a, Malsawm­­dawngtluanga hi ká chhawn lohin a thi. Lal­hriatchhunga leh Malsawmdawngtluanga te hi anmahni lo ve veah an riak a, a hran ve vein an ramchhuak nia thu dawn a ni. Lalhriatchhunga hi thu zawhfiah turin police-in an la.

Career conference
State Council of Educational Research and Training (SCERT) leh Serchhip District Education Office ṭawngkawp chuan, nimin khan Ser­chhip P&E Veng community hall-ah zirlaite pualin 'Career Conference' an buatsaih a; Serchhip khawpui chhunga high school paruka pawl 10 zirlai ṭhahnem tak an tel.

Puantah humhalh dan tur sawiho
Parliamentary secretary (Industries) Joseph Lalhimpuia hoin nimin khan pisaah Mizo puantah humhalh dan tur sawiho a ni. Meeting-ah hian Mizo puan tahte state dangin emaw, ram dangin emaw an lo deh chhuah ve ngawt lohna tura humhalh dan tur sawiho a ni a; Geographical Indication Registration-a Mizo puantah humhalh nana hman dan tur an rel.

Inthiarna hawng
Aizawl Municipal Coun­cil (AMC) chairman CT Zakhuma chuan, nimin khan Ṭhuampuia Ch.Chhunga Bus Terminal-a vantlang inthiarna tur siam thar a hawng. Vantlang inthiarna hi North Eastern Region Capital Cities Development Investment Programme hnuaiah SIPMIU-in an siam a ni.