Private supplier buhfai lei hnuah Buhfaia senso a tlem phah

Food Civil Supplies & Consumers Affairs (FCS&CA) department chuan, private supplier aṭanga buhfai a lei hnuah kum khatah cheng vbc. 5.26 vel a hlép thei dawn. Buhfai phurh man senso pawh kum khatah Rs. 37,82,40,000 vel hlêp thei tura chhût a ni.

FCS&CA department hotute hnen aṭanga thu dawn danin, hun rei tak chhung kalphung ngheta an lo neih tawh thil chi hrang hrang an thlak mek a; chung zingah chuan Targetted Public Distribution System (TPDS) hnuaia thil sem te, buhfai bikah ration card enfiah, buhfai phurhna kawng leh a man te, open market-a buhfai lei dante leh thil dangte a tel. Hengte avang hian senso a tlem phah hle tura ngaih a ni.
Supply department chuan sorkar laipuiin AAY, BPL leh APL-te tana Food Corporatiuon of India (FCI) kaltlangin buhfai a man tlawmin quintal 52,000 vel a hmu a; Mizoram mipui khamkhawp a nih loh avangin thla tin OMSS, MSP leh economic cost aṭangin qtl. 80,000 vel a lei belh ṭhin. FCI chuan state hnena subsidy-a a pek bak state-in a mamawh belh lei ṭhinna chu economic cost chauh a kalpui tawh a, economic cost rate chu quintal khat Rs. 3,134 a ni.
FCSCA chuan kum 2014 khan tender chhuahin, private-a buhfai pe thei tur a zawng a, chutah chuan buhfai kg. khat Rs. 25.75-a pe thei hmuh a ni. Private supplier-in buhfai a pek theihna zat hi FCI aṭanga leina rate aiin kg. khat zelah Rs. 5.59-in a tlawm zawk a; hei vang hian Mizoram sorkarin buhfai mana sum a sen chu kum khatah cheng vbc. 5.36 velin a tlem phah niin department hotute chuan an sawi.
Private supplier aṭanga buh­fai leite chu Zuangtui Muanna Venga kudamah dah khawl a ni. Zuangtui kudam aṭanga Mi­zoram hmun hrang hranga phurh chhuahna man pawh FCI kudam, Tanhril aṭanga phurh man aiin a tlem zawk.
FCSCA hotute chuan, Tan­hrila FCI kudam leh Zuangtuia Supply kudam aṭanga buhfai phurhna man chu an chhut chhuak vek tih sawiin, mimal contractor an neih hnua Zuangtui aṭanga khaw hrang hrang 15-a an phurhna man aṭangin quintal khat zelah Rs. 394 an hlêp thei niin an sawi.
Supply department hotute chuan, FCI aṭanga buhfai lei chu a phurhnaah tihchingpen leh bothlau awm ṭhin mah se, buhfaiin a thlenna tur a thlen chuan FCI-in quintal khat an tih chu quintal khat anga pawm mai a ngaih ṭhin thu an sawi a; private supplier aṭanga an lei erawh chu a buhfai bûk tling lo chu an dawng duh lo thei tih sawiin, "Hei vang hian mimalin a lak hian buhfai bûk pawh a tling zawk dawn a ni," an ti.
FCSCA hotute chuan, End-to-End Computerisation of TPDS Operations Project an buaipui mek tih sawiin, hmang thei turin an inpeih thawkhat tawh tih an sawi a; Online Allo­cation of Foodgrains an buai­pui mek thu leh Supply Chain Management Software an zir chian mek thu an sawi bawk.