KHAWTHLIR

Weighbridge tha
Tanhrila FCI kudama weighbridge dik lo chu June 27, 2015 khan weighbridge siamtu Liotronics Scales Pvt. Ltd. engineer-in a siam ṭha a; Legal Metrology inspector-in a hman theih leh tawh tih a finfiah. Weighbridge siam ṭhat a nih leh tak avang hian truck-te pawhin buhfai an phur chhuak duh leh tawh nia thu dawn a ni.

Kawng thawm tha
Thingsai khuaa lir­thei neitute leh mi ṭhahnemngaite chuan Inrinni khan hnatlangin Thingsai leh Cherhlun inkar kawng an thawm ṭha. Kawng hi BRTF enkawl a ni a, tunlaia ruahsur nasa vangin a chhe hle a, chuvang chuan hnatlangin mi 100 velin thawm ṭhat hna an thawk a ni.

In saksak
Mizoram Upa Pawl, Salem Veng, Aizawl unit chuan Inrinni khan an venga hmeithai pakhat in tur hnatlangin an saksak a, mi 40 an thawk chhuak. In sakna atan hian bialtu MLA, parliamentary secretary Lt.Col. ZS Zuala'n rangva a pe a, Salvation Army, Mualpuikawn Corps-in tile an tumsak bakah, veng chhunga mi ṭhenkhatte'n thingzai leh sum an thawh khawm.

LC-a tling lawmpui
Congress party ṭhalaite chuan Inrinni khan Congress Bhavan-ah martar-te hriatrengna leh MPYCC aṭanga local council member-a thlan tharte lawmpuina an hmang. Inkhawmah hian MPYCC president Vanlalawmpui Chawngthu, MLA leh general secretary Chalrosanga Ralte, MLA-te'n LC member-a thlan tharte lawmpuina thuziak a hlan a ni.

Library hawng
Art & Culture minister R Romawia chuan, Inrinni khan Chawngthansiama Memorial Chaltlang Branch YMA building a hawng. Library sakna atan hian Lalthan­chhungi te chhungkuain an ram an pe a; Raja Rammohan Roy Library Foundation (RRRLF) sum pek Rs. 6,00,000 hmanga sak a ni.