Mizoramah BSF outpost 49 sa thar dawn

Ministry of Home Affairs ruahman angin Mizo­ramah Border Secu­rity Force (BSF) border outpost 49 dah a ni dawn. Border out post turte chu Mizoram khawthlang lama India leh Bangladesh inrina hmun ṭhenkhatah sak ṭan a ni.

BSF-te inkulhna tur border outpost pakhat sak nan cheng nuai 500 vel zel ruahman a ni a, outpost thar 49 sakna tura MHA-in sum a ruahman zawng zawng chu cheng nuai 42,000 a ni. Hei bakah hian, out post sak turin a tihchhiat ram nei­tutehnena zángna­dawm­na sum tur eng emaw zat pêk chhuah a ni.

BSF border outpost pakhat atan ram acre 5-a zau mamawh a ni tlangpui a, tun dinhmunah out post thar sak tur 49 zinga 13 chu sak mai theih turin tihfel a ni tawh. Outpost sak turte chu Engineering Projects India Ltd. leh National Project Construction Corporation (NPCC)-te'n an enkawl a ni.

Border outpost bak­ah, 'Border Flood Ligh­ting' tih hnuaiah ramri hrúlah êng chhit chhuah vek tur a ni a, diesel generator hmanga êng pek chhuahna tur hrui zam mek a ni.

Thu dawn danin, Bang­ladesh sorkar pawh­in an ramri véngtu, Border Guards Bangladesh (BGB)-te awmna turin ram­ri hrúlah border outpost 40 dah belh an tum mek a; India leh Bangladesh inrîna hrúl, Chittagong Hill Tracts (CHT) chhehvelah an sa dawn niin an sawi.

BSF-te chuan, ram pahnih inkarah boruak ṭha lo a awm lohna turin flag meeting an nei ṭhin a, a sâwt hle niin an sawi a, "Kawng hrang hranga thawh dun dan tur kan sawiho a, dân phal loha sumdâwnna hrang hrang vên leh khuahkhirh kawngah nasa takin min pui a ni," an ti.

Bangladesh atanga dân loa Mizoram/India-a lût ru tur vên kawngah theihtâwp an chhuah tih sawiin, "Hei hi ramria kan awm chhan, kan hna pui ber a ni," an ti a; ramri hung a nih chhan chu dan loa Bangladesh aṭanga rawn lut ru ṭhinte tih­tâwpna tur a nih thu an sawi.