CSS hnuaia zirtirtute hlawh tur pe turin ngen

School Education minister H Rohluna chuan June 26, 2015 khan Human Resource Development ministry-a additional secretary Rina Ray chu a pisaah a hmu a, CSS hnuaia SCERT lecturer-te hlawh tur leh CCS hnuaia Hindi zirtirtu mi 1,305-te hlawh tur la pek chhuah loh a rang lama pe chhuak turin a ngen.

H Rohluna chuan, financial year kal mek 2015-16 atana CSS hnuaia SCERT lecturer-te leh Hindi zirtirtute hlawh tur first instalment-ah state sorkarin tih tur ṭul ang angte a tih zawh tawh thu a sawi a; sorkar laipuiin a la pek hmabakte chu a rang lama pe turin a ngen. Rina Ray chuan, a ṭul anga lo bawih zui a tum thu leh a rang lama pek chhuah a beisei thu a lo hrilh.

June 26 vek khan Geology & Mineral Resources minister ni bawk H Rohluna chuan Oil & Natural Gas Corporation (ONGC) director (Exploration) Ajay Kumar Dwivedi pawh a pisaah a hmu a; ONGC-in Mizorama hna an thawh avangin khawtlang leh vantlang tana tih tur an neih, Community Social Responsibility (CSR)-te ṭangkai zawka hman a nih theih nan ruahmanna fel zawk siam thuai turin a ngen.

GMR Minister chuan, ONGC-in Mizorama hma an lak meknate mumal zawka kalpui a nih theih nan Mizoram sorkarin ruahmanna a siam thu sawiin, ONGC Director chu an project-te tihlawhtling thuai turin a hrilh a; ONGC-in tuialhthei zawn hna an thawh mek chu chak zawka an tih theih nan leh sorkar laipui nena MoU an ziah ang taka a hun takah zawh a nih theihna turin chak lehzuala survey ti turin a ngen bawk.

ONGC director Ajay Kumar chuan Mizoramah ONGC-in hna an la thawh rei loh thu sawiin, chuti chungah minister-in a pisaa a tlawh chu lawmawm a tih thu a sawi a; Mizorama hna an thawh mekte chak zawk a thawh a nih theih nan leh harsatna enpui turin remchang hmasa berah Mizorama zin a tum thu a lo hrilh a ni.