Remna Ni - Inpumkhatna nía hmang turin ngen

MNF chuan thu­chhuah siamin, MNF leh India sorkar inremna ziah ni, Remna Ni thleng tur pualin thuchhuah an siam a, "Remna Ni lo thleng turah hian MNF chuan politics inchirhtheh nan hmang mai lo a, ‘Mizote inpumkhatna ni’ atan hmang ṭheuh turin Mizote kan ngen a ni," an ti.

MNF chuan, indepen­dence suala kum 20 chhung MNF-in a beih­naah Mizoramin harsatna tam tak a tâwk tih sawiin, Mizoram Kohhran Hruai­tute Committee (MKHC) te, zirlai pawl leh, political party hrang hrangte hmalakna avangin inrem­na a awm thei niin an sawi a, "MNF chuan independence sual chu tihhlawhtlin ngei duhin, kal zel la tum mah se, a thawh chhan ber khua leh tuite’n tlin tawh loa an inhriat vangin India sorkar leh MNF chuan dawhkân khat an kîl a ngai ta a ni," an ti a; June 30, 1986-ah India sorkar leh MNF chuan remna an siam ta tih an sawi.

Remna a awm theih nana mimal leh pawl hrang hrang hnathawhte chu a chhuanawm a, sawisel tur emaw, fak bik tur tumah an awm niin an sawi a, "Remna hi Mizo mipuite thawh rah liau liau a ni, tih chinah hian lungawi mai ila kan duh," an ti. June 30, 1986-a inremna chu a lehlam lehlam inhnuh hniam theih dan ang a nih thu sawiin, "Remna tluantling leh chhuanawm ber hi lo piang a. Inremna hi India sorkar duhthusam a nih loh ang bawkin, MNF duhthusam pawh a ni lo," an ti.

MNF chuan Rem­na Ni lo thleng tur chu inelrelna leh insawichhiatnaa hmang lo a, rilru hmunkhat, thinlung thianghlim pûa ‘Mizote impumkhatna ni’ atan hmang turin Mizo mipuite a ngen a ni.