Baptist Bookroom-in Rs. 1,43,56,705 an hmu

Baptist Bookroom chuan kum 2014-15 chhung­in lehkhabu hralh­na aṭangin Rs. 1,43,56,705 an hmu a, kum 2013-14 chhunga an hmuh Rs. 1,26,33,559 chu Rs. 17,23,146-in an khûm.

Baptist Literature Service (BLS) enkawl Baptist Bookroom mana­ger Rev. C Lalruatthara'n Vanglaini palai a hrilh danin, Baptist Bookroom hi missionary Rev. FJ Raper-a'n kum 1938-ah sap ram aṭanga a ṭhiante khawl pek hmanga bul a ṭan a ni a, tun thlengin manager 12 an awm tawh a, tunah hian hmun hrang hrangah bookroom pasarih an nei mek.

Baptist Bookroom-ah hian lehkhabu bakah, lehkha ziahna hmanrua leh a kaihhnawih hrang chi 10 chuang an zuar. Kum 2013-14 chhungin Rs. 1,26,33,559 an hmu laiin, kum 2014-15 chhungin Rs. 1,43,56,705 an hmu a; Aizawl leh khaw danga bookroom tintin kum hmasaa an khûm vek a ni.

Kum 2013-14 chhung khan lehkhabu hralhna bik aṭanga an budget chu Rs. 32,00,000 a nih laiin, Rs. 38,72,414 an hmu chhuak a, budget chu Rs. 6,72,414-in an khûm. Kum liam ta 2014-15 chhungin lehkhabu hralhna bikah budget chu Rs. 33,00,000 a ni a, Rs. 47,23,342 hmu chhuakin, budget chu Rs. 14,23,342-in an khum a ni.

Rev. C Lalruatthara chua, ṭhalaite zingah lehkhabu ṭha chiar an la tam hle nia sawiin, "An duh zawng chu a man pawh to se an lei ngam a, thil tak tak ziahna hi an ngaihven zual," a ti a; an Bookroom hrang hranga lehkhabu an hralh dan aṭanga tehin, ṭhalaite'n lehkhabu ṭha an la zawng peih hle tih a sawi.

Baptist Bookroom Manager chuan, Mizo­ram chhim lam aiin hmar lamah lehkhabu an chhiar nasa zawka an hriat thu leh chhim lamah ṭan an lak reng thu a sawi a, "Tunlai ṭhalaite chu technology tharin a khawih chhiat hlauhawm viau mah se, lehkhabu ṭha chu kan la hralh thei reng a, a la hlu reng a, moral reform lam hawi lehkhabu ṭha phei chu an duh viau a ni," a ti.