Health Minister-in Mizoram mamawh a thlen

Health minister Lal Than­zara chu Inrinni khan Guwahati-a hmarchhak state Health Minister-te tana 'Review Meeting on Progress under National Health Programmes' buatsaihah a tel a; Mizoram mamawh hrang hrang a thlen.

Lal Thanzara chuan, Mizorama H1N1 vei hmuh­chhuah mi palite tlachawp taka enkawlna siam sak an nih thu sawiin, "Swine flu leh inkaichhawn theih hriléng enkawlna Mizoramah a rang lama neih thuai a ṭul," a ti a; National Health Mission aṭanga State Health Society-a sum lut ṭhin chu state sorkar Finance department kaltlanga a luh tak avangin sum pek chhuah kawngah harsatna leh programme hrang hrang tan buaina a siam thu a sawi.

Saiha district chhunga nausen thihna tihtlem a nih theih nan special package mamawh a nih thu sawiin, Health Minister chuan, "Mipui­te an hriatna a la bil avangin an hriatna tuaihriam kawngah IEC material atan special package hman ni se a ṭhat a rinawm," a ti.

Lal Thanzara chuan, Mizorama district pakua leh khaw 932-ah Village Health Sanitation and Nutrition Committee din a nih thu te, khum 150 awm theihna State Refferal Hospital chu sorkar laipui scheme pakhat 'Upgradation of Existing District Hospital' hmanga medical hospital atan tihchangtlun hna kalpui a nih mek thute leh, National Urban Health Mission Programme hmangin Aizawlah urban primary health centre paruk leh Lungleiah pahnih thuam a nih tawh thute a sawi bawk.

Meeting hi Union Health minister Jagat Prakasg Naddaji-a'n a kaihruai a, sorkar laipui hnuaia health programme hrang hranga hmasawnnate thlirho a ni.