Thingdawl NGO-te an insawifiah

Thingdawl, Kolasib district-a tlawmngai pawl hrang hrang intêlkhawm, NGO Coordination Committee chuan thuchhuah siamin, June 20, 2015-a Tommy Lalhlimpuia s/o Zomawii chu Thingdawl leh hmun dangah vawi tam tak pawi khawih tawh a nih avangin a chungah an khaw mipuite an thinrim a, inkhap zawh rual lohin mipuiin thinurna an lantir niin an tarlang.

Thingdawl NGO-te chuan, Tommy Lalhlimpuia chu Thing­dawl khua leh tui nihna nei tawh lo a nih thu sawiin, "A thil tihsual vangin jail-ah dah a ni ṭhin a, pawngsual ringawt pawh vawi duai lo khawih tawh, rûkrûk phei chu sawi sên a ni lo. Jail-ah awm ve bawk mah se, a lo chhuak leh tih hriat meuh chuan pawi a lo khawih hman leh tawh ṭhin. Tun hnaia Thingdawl khuaa a pawikhawihna thilah dan ang taka rorel duh mah ila, khawtlang thinurna nasa tawh lutuk chu alh chhuakin, inkhap zawh rual lohin a chungah leh amah humhimtute chungah mipui thinurna tihlan a ni," an ti.

Police-in an kuta awm tawh misual humhim tura theihtawpa ṭan an khawh chu an dem lo tih an sawi a; chutih rualin, silai an hmeh puah chu van lamah chauh ni loin, lei lam hawi pawhin an hmet puak ngei niin an sawi bawk.