2014-a Mizorama thil man punna Chawhrualin 8.92% a ni

Economics & Statistics (E&S) department chuan nimin khan Aijal Club-ah Statistics Day an hmang a a, E&S minister Lalsawta'n a hmanpui. He huna 'Price Trends in Mizoram 2014' tlangzarh tâk chuan, kum 2014-a Mizorama thil man pun dan chawhrual chu 8.92% a nih thu a tarlang.

Lalsawta chuan, Economics & Statistics chu statistics dik lo siam thiang an ni lo tih sawiin, "Department ṭhenkhat chuan an hnathawhnaah hming ṭhat duh vang leh hlawk zawk an thlir avangin statistics dik tawk lo an nei a nih pawhin, nangni chuan in ti ve tur a ni lo," a ti a; thawktute chu nasa zawk statistic dik neih nana ṭan la turin a fuih.
Minister sawi danin, an department chuan mipui, kohhran leh tlawmngai pawlte tan chhinchhiahna tur statistics dik leh rin tlak an vawn sak ṭhin a; statistics chu mahni duh thu anga siam mai chi a ni lo a, a vêlah innghat loin, a chiah chiah hriata chhinchhiah tur a ni.
Lalsawta chuan Economics & Statistics chu statistics rintlak a awm theihna atana din a nih thu sawiin, "In hnathawh hi a pawimawhin, ram tana chhawr nahawm tak siamtu in ni," a ti a; rilru siam thara inhlan turin department-a thawktute zawng zawngte chu a ngen.
Statistic Day-ah Indian statistician ropui, Prof. Prasanta Chandra Mahalanobis (1893-1972) chu sawi hmaih a thiang lo tih sawiin Lalsawta chuan, "Mimal taka statistics laboratory dintu a ni. Sorkar ngei pawhin statistics pawimawhna a la hriat vak loh laia bul lo ṭan a, hna lo thawk nasa a ni. Statistics luh chilha a buaipui avang hian khawvel ram hrang hrang hriat leh ngaihsan a hlawh a ni," a ti.
Statistic Day puala inkhawm hi Economics & Statistics director Vanlalrema'n a kaihruai a, Pachhunga University College-a assistant professor Lalthlamuana Ralte-in social development leh a kaihhnawih department hrang hrang chungchanga paper a present zirho a ni.
Statistics Day hmannaah hian Economics & Statistics-in 'Price Trends in Mizoram 2014' tih an buatsaih chu minister Lalsawta'n a tlangzarh. Statistics Day hi district headquarters dangah pawh nimin khan hman a ni.
'Price Trends in Mizoram 2014' tihchhuah taka a lan danin, kum 2014-a Mizorama thil chi hrang hrang man san dan chawlhrual (inflation rate) chu 8.92% a ni a, hei hi India ram puma inflation rate 7.16% aiin a sang zawk.
Kum 2014 chhunga Mizorama inflation rate 8.92% hi hmarchhak state pariat zingah chuan a laihâwl vel a ni a, Arunachal Pradesh, Tripura leh Meghalaya-te Mizoram aia thil man sânna a tam laiin, Sikkim, Nangaland, Manipur leh Assam-ahte erawh chuan Mizoram aiin a hniam thung.
Mizoram chhung bika thil man a pun chhoh dan chu, kum 2012-ah 8.67% a ni a, kum 2013-ah chuan 9.06 a ni thung.