KHAWTHLIR

Thisen pe
Mosia Agencies chuan nimin khan Aizawl Civil Hospital-ah blood donation camp an huaihawt a, thisen unit 25 an pe a, a petute mipa vek an ni.

Lirthei tlan dan Tihdanglam a ni
Aizawl Traffic SP chuan thuchhuah siamin, Modern Higher Secondary School péngṭhuam aṭanga New Market pana chhuk zawnga LMV chin chunglam tlân phal loh hun tihdanglam a nih thu a tarlang. Tlan phal loh hun zing dar 7 aṭanga zan dar 7 inkar ni ṭhin chu zing dar 6 aṭanga zan dar 8-ah thlak a ni.

MIFCO thukhawm
MIFCO Board of Directors chu nimin khan an pisaah an ṭhukhawm a; chairman PC Zoram Sangliana, MLA chuan, MIFCO chu a din chhan ang ngeiin loneitute leh thlai huan neitute thar chhuah sâwngbâwl a, hlâwk zawka thar chhuahte hralh a nih theih nan insiam thar a pawimawh tih a sawi.

NLUP sem
Soil & Water Conservation department chuan nimin khan Champhai district chhunga NLUP hnuaia coffee leh hmun­phiah chìn thlangtu chhungkaw 13 hnenah ṭanpuina sum an hlan. Hmunphiah thlangtute hnenah Rs. 26,600 ṭheuh leh coffee thlangtute hnenah Rs. 66,440 ṭheuh pek a ni.

Heroin man
Excise & Narcotics department-a Anti-Narcotics Squad chuan Pathianni zing dar 5 khan heroin gram 15 leh a neitu Malsawmliani (26), Edenthar Veng nia inchhál chu an man. Pathianni vek zing dar 7:15-ah heroin gram 11 leh a neitu, Thuamthanzuala (500, Aizawl Venglai nia inchhál an man a; zing dar 9-ah heroin gram 28 leh a neitu Zunkimi (46), Khawmawi, Myanmar nia insawi an man bawk.

Cooperative conf.
Lunglei District Cooperative Union Ltd. chuan nimin khan Lunglei Sub-Hqrs YMA conference hall-ah general assembly an hmang a, Assitant Registrar Cooperative Society Lily Pari Sailo in a hmanpui.