Hamsapara-ah Bru chhungkaw 2 an inlan
Tripura relief camp-a Mizoram Bru-te lak let tumna kal zelah, nimin khan Hamsapara camp-ah Mizorama kir duhte enfiah hna ṭan a ni a; chhungkaw pahnih an inlan.
Hamsapara-a Bru-te enfiah tur hian Kolasib SDC Lalhmingliana leh Mamit SDC Lalbiakfela leh an thawhpuite an kal a; nimina an hnena inenfiahtirte chu Chhungkhawrama te chhungkuaa mi panga leh Porati te an ni. Hamsapara-ah hian Mamit district-a mi Bru chhungkaw 248 leh Kolasib district-a mi chhungkaw panga an awma ngaih a ni.
Hamsapara camp-ah pawh hian Kaskau leh Khakchangpara camp-a an tih ang bawkin, Bru-te chuan Mizorama an kîr an duh loh thu leh an duh loh chhante ziakin Mamit SDC hnenah an pe a ni. He camp-ah enfiah hna thawh hun chu July 2, 2015 thleng a ni dawn a; Mizorama let duhte chu July 6-10 inkarah lak let an ni ang.