MCU-in thu dik lo sawiah MICODA an puh

30th June, 2015

Mizoram Consumers’ Union (MCU) chuan thuchhuah siamin, Mizoram Cable TV Operator and Distributor Association (MICODA)-in July 2015 aṭanga cable TV monthly fee tihsan an tum, MCU leh Telecom Regulatory Authority of India (TRAI) remtihna anga tih a nih thu an puan chu thu belhchian dâwl lo niin an tarlang.

MCU chuan, MICODA-te chuan cable TV thla tina chawi ṭhin tihsan chungchangah MCU an dâwr ngei a, TRAI-in India ram pum tana tariff order a siam zâwm turin an lo ngen niin an sawi.

MCU chuan cable TV operator-te chu dan ang taka thil ti tur leh TRAI dan zâwm hram turin an ngen a, "A tam berin channel an pek chhuah zat aṭanga chhûtin fee hi Rs. 200 aia tam lo tur a ni. Chuvangin fee hi tisang rih lo turin kan ngen a ni," an ti.

MCU-in TRAI-in Non-Cas area tana January 1, 2014-a hman ṭan tura tariff a siamte an tarlang a; TRAI rate siam MCU a tarlante chu a hnuaia mi ang hi a ni.

1. A tlem berah free (FTA) channel 30 leh pay channel 20 thleng an pe ang a, a rate chu Rs. 234 aia sang lo tur a ni.

2. Free channel 30 leh pay channel 20 aia tam pein Rs. 292 aia sang lo an charge thei.

3. Free channel chauh pein a tlem berah channel 30 a pe ang a, subscriber hnenah Rs. 117 an la ang.

4. Entertainment tax Rs. 20 belh theih a ni a, hei hi sorkarah a lut tur a ni.

5. Free channel 30-ah Information & Broadcasting dan angin Doordarshan channel pariat vel an pe tel tur a ni.

6. Free channel hi en duh leh duh loh lam aiin, India ram inpumkhat nan, hnam tinin anmahni duh zawng an en theih tura dan siam a ni.

7. Pay channel hi TRAI-in a hrilhfiah dan chuan, electronic transmit or re-transmit a ni tur a ni a, distributor aṭanga lei tur a ni. (LPS leh Zonet-te hi operator pangngai aiin an case a dang deuh).

8. Foreign film/vai film ṭhenkhat lehlin chawpa public en atana tih hi phalna bik neih loh chuan dan phal loh a ni. Heng hi society tana ṭha lo a nih avangin titawp ṭhen turin MCU chuan operator-te a ngen a ni.

9. Operator-te'n an duhthua consumer-te an disconnect sak hi Consumer Protection Act, 1986 kalh a ni.