KHAWTHLIR

Thisen pe

Champhai to Aizawl Maxicab Service Owners Welfare chuan an din champha vawi 25-na lawm nan nimin khan Champhai District Hospital tan Kahrawt VC Hall-ah thisen pek an huaihawt a, thisen unit 26 an pe.

Centre hawng

Social Welfare & Tribal Affairs (SWTA) director Lalhriatzuali Ralte chuan nimin khan Laipuitlanga SWTA Specially Abled Person Training Centre-ah Beauty & Wellness Training Centre a hawng. PMKVY hnuaia a vawi khatna atan MSME scheme - Professional Makeup Artist Training kalpui tur a hawng nghal bawk.

Heroin man

Serchhipa Excise & Narcotics duty-te chuan February 2, Pathianni zan khan Chhiahtlang Hmarvengah Laldingliana (41) s/o Saithangpuia(L), Chhiahtlang Hmarveng hnen aṭangin heroin gram 83.62 an man. Narcotics Drugs and Psychotropic Substances Act, 1985 tlawhchhanin thubuai ziah luh a ni.

Vaccine pek sawiho

Lawngtlai District Task Force for Immunization chu nimin khan additional DC Zoramsiama Hmar kaihhruaiin DC conference hall-ah an ṭhu a, hmalak dan turte an rel. Zoramsiama Hmar chuan, hunbi neia vaccine pek chhuahah Lawngtlai district-in hmasawnna tur a la ngah thu a sawi a, "Khaw tam takah vaccine la duh lo an la awm hi a veiawm tak zet a, chak zawka awareness kalpui a ṭul," a ti.

Gelatin man

Mizoram Police leh Assam Rifles-te chuan January 31, 2025 khan Edenthar Vengah lirthei aṭangin gelatin tlâwn (stick) 2,000 leh a tihpuahna detonator 800 an man. Gelatin leh detonator neitua puh mi pahnih - Rochansanga (41) s/o Chalngura, Thingsai leh Emmanuel Lalpianpuia (24) s/o G Dothanga, NE Tlangnuam nia insawite an man nghal bawk.

Advocate a nih hre lo

Mizoram Bar Association chuan nimin khan thuchhuah siamin, Seventh Day Adventist Hospital-a buaina thleng avanga police-in an man zinga mi Roderick Thangdingliana Renthlei (Roderick Renthlei) chu advocate angin inchhál mah se, advocate a nih an hriat loh thu leh an member a nih loh thu an tarlang. Mizoram Bar Association chuan, "Hetianga advocate hming chhála mi dangte diriam leh chungtlak zawnga thil tih hi pawi kan tiin, mahni nih lohna anga inchhal hi tun hnuah thleng tawh lo se kan ti tak zet a ni," an ti.

Hotel-ah hmeichhia thiin hmu

February 2, Pathianni tlai dar 2:30 vel khan Hotel Ahimsa, Zarkawta pindan pakhatah Sarah Malsawmzuali (26) d/o Johnny Zoliansanga chu thia hmuh a ni a, nimin khan Dawrpuiah vui a ni. Thu dawn danin, Sarah Malsawmzuali hi tun hnai khan Delhi aṭangin Aizawlah a rawn chho a, Hotel Ahimsa-ah a thleng a ni. Pathianni zing khan hotel enkawltute'n a pindan an kik a, a chhang lo; chawhnu dar 2:30 vela an ngaihven leh pawha a reh tâk reng avangin pindan kawngkhar an kar hawng a, thiin an hmu ta a ni.

Inthlan atan inbuatsaih

Saitual district election officer Dr Lalngura Tlau, bawrhsap kaihhruaiin nimin khan DC conference room-ah sorkar hotute leh NHIDCL aiawhte'n VC inthlan laia inkalpawhna kawngpui, kawlphetha, tui leh damdawi, etc-ah harsatna a awm lohna tura hmalak dan tur an sawiho. Kolasib-ah pawh nimin vek khan VC inthlan neih tura presiding officer 91 leh polling officer 173-te tan training buatsaih a ni.