Champhai Zotlang - New Champhai Kawngpuiah speed breaker siam rawt

Champhai bawrhsap VL Remliana hoin nimin khan DC conference hall-ah District Level Road Safety Committee an ṭhu a; Champhai Zotlang leh New Champhai inkar kawngpuiah lirthei tlân chak lutuk tur vèn nan speed breaker siam tura ngenna thlen an rel.

Ṭhutkhawmah hian tun hnaia Champhaia lirtheia chetsualna thlen tamna hmun, Champhai Zotlang leh New Champhai inkar kawngpui, Faith Farmhouse leh 7th Day Workshop inkarah invaukhânna (warning sign) mumal tak siam ni se, an ti a; kawng enkawltu PWD (Highway Division) hnenah lirthei tlân chak lutuk tur vèn nan speed breaker siam tura ngenna thlen ni se, an ti a ni.

Champhai district-a Road Safety Month hman tur chu February 6, 2025 zing dar 7:30-ah hawn an rêl a; Road Safety Month chhungin MVI, Police leh Excise & Narcotics department-te'n khawng takin lirthei leh lirthei khalhtute endik se, kawngpuia veivâk leh lirthei khalhtute him zawkna turin inzirtirna uar taka kalpui ni se, an ti.

Road Safety Month pualin zirna-in hrang hrangah zirlaite thutiam lakna hun hmanpui tum a ni a, NCC cadet-te'n traffic duty-te an pui dawn. Lirthei zuartute chu an dawr hmunhmaah Road Safety Month lam hawi inzirtirna târ tura beisei an ni bawk.