Holistic Progress Card leh zawhna siam dan zirhona Aizawlah buatsaih

Mizoram Board of School Education (MBSE) leh NCERT hnuaia Performance Assessment, Review and Analysis of Knowledge for Holistic Development (PARAKH) ṭang dun chuan nimin khan MBSE conference hall-ah Holistic Progress Card leh Standardization of Question Paper Templates zirhona an buatsaih a, School Education special secretary David Lalthangtluanga'n a hawng.

Zirhona hi ni nga awh tur a ni a, Mizorama high school, higher secondary school, Institute of Advanced Studies in Education (IASE) leh District Institute of Education and Training (DIET) aṭangin zirtirtu 50 chuang an tel.

PARAKH mithiamte'n Holistic Progress Card zûlzuia assessment rubrics duan dan te, state question paper zirchianna te, assessment design and blueprint siam dante leh model question paper duan dante an zirtir dawn a ni.

David Lalthantluanga chuan, zirlaite hmasawnna tehfung atan exam-naa an mark hmuh piah lamah, an thil zirte a taka an hman chhuah dan te, mi zinga an khawsak dan leh thil dangte huamtir chuan zirlaiteah hmasawnna dik a thlen a beisei thu a sawi a, "Hlawhtling taka Holistic Progress Card hman a nih theih nan mawhphurhna nei zawng zawngte inpekna leh ṭanrualna a pawimawh," a ti a; zirnain hma a sawn zel theih nan theihtawp chhuah turin zirtirtute a chah.