VC/LC thlan tura inbuatsaihna thlirho

Lunglei district election officer Navneet Mann hoin nimin khan a pisaah February 12, 2025-a VC leh LC inthlanpui neih tura nodal officer-te'n inthlan atana inbuatsaihna an thlirho.

Ṭhutkhawmah hian VC/LC inthlannaa vote thlakna atana hman tur ballot paper her chhuah zawh a nih tawh thu te, electoral roll chhinchhiah hna leh inthlanna lehkha leh hmanraw pawimawh ruahman hnate kalpui mek a nih thute tarlan a ni.

Inthlan kaihhnawiha duty turte tana postal ballot hmanga vote thlak theihna tur ruahmanah district danga vote nei, postal ballot hmanga vote thlâk tumte tana hun hawn chhungin dilna 103 dawn a nih thu te, Lunglei district-a vote neite tana February 7, 2025 thleng dilna hun hawnah nimin thlengin dilna 500 a luh tawh thute tarlan a ni bawk.