Lalnutui-ah VC thlan hun sawn

February 12, 2025-a village council leh local council inthlan neih tur atan inbuatsaih mek zel a ni a; hetih lai hian, Lunglei district-a Lalnutui khuaah chuan MNF candidate a thih avangin February 13, 2025-ah inthlan buatsaih tum a ni.

Lalnutui khuaa MNF candidate pakhat thih chungchangah hian state election commissioner Dr H Lalthlangliana chuan, "Dan angin candidate list tihchhuah tawh a nih avangin candidate thi aiawh tur thlaktu ruat mai theih a ni tawh lo a, candidate tur zawng zawngin nomination a thara an tih vek a ngai tawh. Chuvangin, February 12-ah inthlan theih a ni dawn lo a, February 13, 2025-ah inthlan buatsaih tum a ni," a ti.

State Election Commissioner sawi danin, Ṭhiak khua leh Lawipu vengah pawh candidate thi an awm a, mahse, candidate list tihchhuah a la nih loh avangin dan angin mitthite thlakna tur siam theih leh nomination file theih a ni.