Larsapin India zalenna sualtu Darthawma a chennaah a tlawh

Mizo zinga India zalenna sualtute zinga la dam awmchhun nia hriat, Darthawma (96), Lunglei Chanmari chu a chenna inah Governor Lt.Gen. Nirbhay Sharma chuan nimin khan tlawh a, thilpek a hlân.

Sorkar thuchhuah tarlan danin, Darthawma hian Indopui Pahnihnaah Indian Army Medical Corps a zawm a, Japan rál bei turin Malaysia thliarkar pakhat, Penang-ah a kal a, chumi hnuah British sipai do lêt tur leh India tana zalenna sual turin Subhash Chandra Bose-a din Azad Hind Fauj (Indian National Army) a zawm leh a ni.

Darthawma hi Singapore jail-ah a táng a, chumi hnuah thla 14 chhung Lucknow leh Chittagong jail-ahte a táng leh a, January 15, 1945-ah chhuah a ni.

Nimin khan Lungleia Cultural Heritage Centre-ah Darthawma chawimawhna inkhawm hman a ni a, Lunglei DC Abhijit Vijay Chaudhary-a'n kaihhruaiin, Larsapin a hmanpui. Darthawma erawh wheelchair hmang chauha che sawn thei tawh a nih avangin a tel lo a, a inah Governor chuan a tlawh.

Larsap chuan, Mizoramah Mizo hnam leh India tana pasalṭha, tuna la dam ngei a chibai thei chu ropui a tih thu leh a rilru a hneh thu a sawi a; India ramin tun dinhmun a thlen theih chhan te, a ropui chhan te, a zalen chhante chu India zalenna atana sualtute thawh rah liau liau a nih thu a sawi.

Lt. Gen. Nirbhay Sharma chuan, zalenna hlutzia hriat chian tum tur leh zalenna sualtute zah nachang hre turin ṭhangtharte a chah a, "Ṭhangtharte tan ram leh hnam inpumkhatna ngaih pawimawh hi zahawmna atan thil pawimawh tàwp a ni," a ti.

Zalenna sualtute Mizote'n an thlir dan chu ennawn ni se ṭha a tih thu sawiin, "Tun hmaa India ram ni lo, tuna India ram chhung ni ta, hmun hrang hranga British awpbehna duh loa dotu zawng zawngte kha an hnam bil tan pasal-
ṭha an nih rualin, India tan pawh pasalṭha an ni a, zalenna sualtute an ni," a ti bawk.