College-a thu sawi tura politician-te sawm khap chungchanga party hruaitute ngaihdan

ZNP president Lalduh­oma chuan, politician-te'n college-ah thu an sawi theihna turin sorkarin inkaih­hruaina siam se a duh thu a sawi a; MPC senior vice president Vanlalhlana chuan, sorkarin college-a politician-te thusawi a khap chu a hriatthiampui rualin, khap bur erawh ṭul a tih loh thu a sawi.

Nimina thuthar theh­darhtu ṭhenkhatin an kawmnaah Lalduhoma chuan, “College-a politi­cian-te thusawi tura sâwm an ni ṭhin hi zirlaite tan thil ṭangkai tak a nih theih rualin, zirlaite rilru tikhawlo thei a nih bawk avangin fimkhur a ngai hle a ni," a ti.

Higher & Technical Edu­cation department-in August 18, 2016-ah thupek chhuah a, Mizo­ram sorkar enkawl college hrang hranga politician-te thu sawi tura sâwm a khap chungchang sawiin, Duhoma chuan, "Poli­tician ṭhenkhatte’n poli­tical platform emaw tiin thu dik tâwk lo an sawi
ṭhin," a ti a; chu vang chuan fimkhur a ngaih thu a sawi.

ZNP President chuan, Lal­duhoma chuan, college-a politician-te thusawi khap tawp chu ṭha lo a tih thu sawiin, “Khap tawp loin, kaihhruaina fel tak siam ni zawk se. Zirlaite'n an hriat duh zawng zawhnate siamin, chu chu chháng
ṭhin ila, kan hlâwkpui tlan a rinawm," a ti.

ZNP President chuan, college zirlaite hmaa thusawinaah, thu dik hrûla thu dik chanve hmanga party politics hamṭhatna lak tum an awm ṭhin nia sawiin, chutiang tih chíngte vang nia ngaih theih tura khap a ngai ta chu pawi an tih thu a sawi bawk.

MPC senior vice pre­sident Vanlalhlana chuan Vanglaini palai zawhna chhangin, college ṭhen­khata political science zirlaite an kal a, an party din dan leh hmasawn zel dante an hriat duh thu an hrilh tawh ṭhin tih a sawi a, "Political party-te hriat chian an duh vang a ni," a ti.

Mizoram sorkarin sorkar college-a politician-te thu sawi tura sawm a khap chungchangah Van­lalhlana chuan, "Sorkarin khap a duhna rilru tur ka hriatthiampui rualin, khawng taka khap erawh ṭha ka ti lem lo," a ti a; politi­cian-te'n zirlaite hmaa thu an sawi hrim hrim chu a pawina a hriat loh thu a sawi.

MPC Senior Vice Presi­dent chuan, zirlaite hmaa politician-te'n thu an sawi chu pawi a tih loh rualin, party campaign-na anga hman tur a nih loh thu a sawi a, "Political sience zirlaite'n political party-te dinhmun an hriat chian hi a ṭhatna a awm a, mahse, press release-te nen chhut zui chiam a, party ham-
ṭhatna atana hman tum erawh a ṭha lo," a ti.

Politician-te college-a thu sawi tura sawm sorkarin a khap chungchangah hian MNF party hruaitute pawh an ngaihdan zawh a ni a; an sawi zui duh rih loh thu Vanglaini an hrilh. MNF president Zoramthanga chuan, "An target ber ka ni a, comment pa pe rih lo mai ang e," a ti.

MNF MLA Lalruatkima pawhin nimin khan Mizo Hnam Runah thu sawiin, College-a politician-te sawm khap a ni chu ṭha a ti lo tih sawiin, "Zirna in sang university leh college sylla­bus-ah Mizo national move­ment a awm avangin zirlaite tana tangkai tur anih beiseina avangin, Zirlai naupang ten an zirlaibua inziak bak hriat belh chakin, a hun laia la dam, Mizo national movement kengkawhtute an kawm duh hi dem chi an ni lo," a ti a, college-a politician-te demna thu leh a khapna thu chhuah duhtu hi khawvelin an dem rawn a rin thu a sawi.