MBBS leh BDS-a seat zat tur a la hriat loh

Mizoramin Bachelor of Medicine, Bachelor of Surgery (MBBS) leh Bachelor of Dental Surgery (BDS)-a seat a neih zat tur hriat theih a la ni lo. Hetih lai hian, National Eligibility cum Entrance Test (NEET)-a tlingte'n harsatna an tawh lohna atan Higher & Technical Education (HTE) department-in an buaipui dawn.

Vanglaini palai zawhna chhangin HTE hotute chuan, "MBBS leh BDS-a kan seat neih dan tur hi kan la hre thei bik lo. Sorkar laipuia thuneitute kan zawh pawhin lo nghak tawp turin mi ti a, kan lo nghak tawp mai a ni," an ti.

Mizoram quota-a MBBS leh BDS zir tur thlanna, State Medical & Technical Entrance Examination (SMTEE) kaltlanga inziak tlingte chu councelling pek vek an ni tawh a, nikuma Mizoramin quota a neih milin councelling-ah hian koh an ni.

NEET-a inziak tlingte chu sorkar laipuiin councelling an pek vek tur ni mah se, harsatna an tawh lohna atan HTE department chuan ruahmanna an siam a, thil pawimawh hrang hrang an hrilhfiah dawn.

Mizoram quota-a MBBS leh BDS zir tur hian hian Supreme Court thupek angin NEET paltlang a ngai tih a ni a; mahse, a hnuah SMTEE kaltlanga tih tura tih leh a ni. NEET-a tlingte hi chuan Mizoram quota ei hêk loin MBBS leh BDS an zir thei dawn a ni.