AMRUT hnuaia hmalakna sawiho

UD&PA minister Zodintluanga hoin nimin khan a pisa-ah UD&PA, PHE leh PWD hotute'n Atal Mission for Reju-ve-nation and Urban Transformation (AMRUT) hnuaia hmalakna kalpui dan an thlirho.

Zodintluanga chuan AMRUT hnuaia Line department-te chu langtlang taka thawhhona ṭha nei a, khawpui fai leh entawntlak kan neih theih nan
ṭhahnemngai taka ngaihtuahna hmanga thawk turin a chah a, "Sorkar laipui lam an inhawng hle a, hna kan thawh chak chuan sorkar laipui aṭangin sum a lokal chak mai dawn a ni," a ti.

Meeting-ah hian khawpui chhung tuisemna-ah pipe leh tuiherhna aṭanga tui leak te siamṭhat hna thawh mek a nih thu sawi lan a ni a, tui kawr (drainage system) leh sewage management lama hmalakna leh harsatna tawhte sawiho a ni.

AMRUT hian khawpui in tinin tui connection an neih bakah hnawmhnawk leh tui thli paihna mumal ‘sewage system’ nen an inthlunzawmna vek theih nana hmalak te; mumal taka enkawl park leh thing leh mau awmna hmun (green space) siam te; khu leh bal (pollution) a lo tlakhniam theih nana public transport hman uar zawkte leh kea kalte tana hman tur pavement leh a dang siamte a huam a ni.