MPC leh PRISM inchhùn fin dawn

Mizoram Peoples' Conference (MPC) party leh PRISM party chuan thuchhuah inṭâwm siam­in, party pahnihte chu party pakhata inchhûn fin turin inremna an nei vek tawh tih an tarlang.

MPC leh PRISM thu­chhuah chuan, "Zoram tluchhe mek tung­ding leh turin MPC leh PRISM-te chuan party pakhata inchhûn fin zai rêlin hmalakna chak takin kan kalpui mek. A hmáwrbàwkna nei tur joint committee pawh September 16, 2020 khan MPC president Pu Lalhmangaiha Sailo leh PRISM president Pu Vanlalruata ten ruahmanna an nei tawh a ni," an ti.

Pawl pahnihte chuan, "MPC leh PRISM party-te kan inbiak tawhnaah party hming, constitution leh symbol chungchangah te, party hruaitu turahte harsatna nei loin kan inrem thei vek tawh a ni," an ti a; September 19, vawiinah an ṭhukhawm leh dawn a, an inchhûn fin hun leh hmun tur an ruahman dawn niin an tarlang.