Minister pathumin Hunthar Veng an tlawh Sorkarin theihtawp a chhuah dawn - HM Zira

Hunthar Venga lei khì leh min chu nimin khan minister pathum - R Lalzirliana, Lal Thanzara leh C Ngunlianchunga ten an tlawh. Home Minister chuan, lei a min tawh lohna atan leh lei min vanga harsatna tâwkte tan sorkarin theih-tawp a chhuah tur thu a sawi.

Home Minister chuan, Hunthar Venga lei tla-hniam ṭhin zir chiang tur-in vawiin hian Geology Survey of India (GSI), Shillong aṭang-
in mithiamte an lo kal dawn thu a sawi a, "Sorkar chuan he lai hmuna lei min ṭhin hi a reh theihna atan leh leimin vanga harsatna tâwkte tan theihtawp a chhuah dawn a ni," a ti.

Leimin vanga in ṭhiah ngaite chu in chhe vek (fully damage) anga ṭanpuina pek an ni dawn tih sawiin R Lalzirliana chuan, "Chenna in tuna nei lote tan UDPA department-in Edenthar Venga chenna in nei lote tana in an sakah an duh chuan an awm theih dan ruahman a ni ang," a ti a; in leh lo chánte chu Ramhlun Venga lei tawlh leh khî tuarte tana sorkar ram leiah inhmun ngaih-tuahsak an nih tur thu a sawi.

In chhe veka puan a nih chuan in leh lo chánte chuan sorkar aṭang-in zangnadawmna Rs. 1,01,900 an dawng thei dawn a ni.

Bialtu MLA Lal Thanzara pawhin thu sawiin, Hunthar Venga lei tlak-hniam ṭhinna hmun chu ṭum eng emaw zat an tlawh tawh tih a sawi a, "Tih theih
erawh a váng ang reng hle. Chutih rual-in, sorkarin theihtawpin hma a la ve reng a ni," a ti.

Disaster Management & Rehabilitation minister C Ngunlianchunga chuan, Hunthar Veng lei tlahniam ṭhin vênna atan concept paper siamin thuneitu lamin cheng nuai 800 an pawm tih sawiin, "GSI endik phawt a ngaih avangin GSI mithiamte hi an rawn kal ang a, an endik hnuah hna ṭan thuai theih a nih a rinawm," a ti a; GSI-in an endik hnuah chuan cheng nuai 800 aia tam sum hmuh theih a beiseiawm thu a sawi.

DMR minister C Ngunlianchunga hian Hunthar Veng YMA hnenah a ṭul anga hman atan Rs. 10,000 leh rangva bundle hnih a pe.

Hunthar Venga leimin vang hian nimin tlai thleng khan in pasarih ṭhiah a ni tawh a, chungte chu chhungkaw 11 luah lai a ni. In ṭhiah bakah hian chhungkaw dang 19 chu an hlauhthawn avangin an in an chhuahsan tawh. Mimal in bakah, Baptist Churchu of Mizoram biak-in chu an luah ngam tawh loh avang-in a chhunga bungraw awmte thiar chhuah a ni.

Hunthar Veng khaw-tlang hruai-tute chuan, in aṭanga inthiar chhuakte chu awmna hmun tur an zawnsak tih sawiin, "Ṭhenkhatin an chhungte an fin a, ṭhenkhat chu Legal Metrology building-ah dah niin, a ṭhen chu MHIP building-ahte dah an ni. Veng chhung chhuahsana hmun danga awmte pawh an awm," an ti.

Hunthar Veng khaw-tlang hruaitute sawi danin, lei min leh khi vanga harsatna tâwk chhungkaw 30-te chu Aizawl DC
aṭangin chhawmdawlna ni tin puitling tan Rs. 60 leh naupang tan Rs. 45 pek an ni ang.