BJP-in mi rilru tihnat pawi an ti

BJP Mizoram Pradesh chuan thuchhuah siamin, pasalṭha Khuangchera chawimawina hun hman tum chungchangah ngaihdan kalsual palh a awm thu leh chumi vanga mi tam tak rilru tihnata a awm chu pawi an tih thu an tarlang.

Mizoram BJP chuan, pasalṭha Khuangchera chawimawi chu Indian freedom fighter anga chawimawi tumna a ni lo nia sawiin, "British imperialism doa beitu, Mizo pasalṭha lâr zinga nunna chán hmasa ber a nih vanga chawimawi tlakah ngaia chawimawi leh zahna lantir tumna vang zawk a ni," an ti.

BJP chuan, Mizo-rama BJP chak taka ṭhang lian chho mek ertu leh beitute'n a ni lo zawnga thu an kalpui avangin thil a kal sual nia sawiin, chumi vanga an president Prof. JV Hluna lim hâl a ni chu pawi an tih thu an sawi a; "Pasalṭha Khuangchera thlâna ‘Mizo/Indian freedom fighter’ tih inziak haw si lo a, BJP hmalaknaa pasalṭha Khuangchera chawimawina leh zahna lantirna hun haw viautute hian BJP ertu party
ṭhenkhatte duhthusam an tihlawhtling mai chauh a ni," an ti.

MIzoram BJP chuan, tun hnaia Home minister R Lalzirliana’n, party tênau pawh pawh ni se, thawhpui theih loh an neih loh thu a sawi chu Congress party beidawnna rilru a pholang chiang hlea an ngaih thu an sawi a; kum 2018 Assembly inthlan awm turah party dang thawhpui lo chuan Congress party chu engmah an ni dawn lo tih an puanzarnaa an ngaih thu an tarlang.