NE Venture Fund scheme siam

North Eastern Development Finance Corporation Ltd. (NEDFi) chuan hmarchhak biala company dintute an phûr theih nan Ministry of DoNER nen ṭangkawpin 'North East Venture Fund' scheme an siam thar tih an tarlang.

NEDFi thuchhuak tarlan danin, North East venture Fund hnuaiah hian cheng vbc. 100 dah a ni a, chu'ng zinga vbc. 45 chu DoNER-in an tum dawn a, NEDFi-in vbc. 30 tumin, vbc. 25 dang chu financial institution dangte'n an tum ang.

North East venture Fund pual hian NEDFi chuan company dang pahnih - NEDFi Trustee Ltd. leh NEDFi Venture Capital Ltd. a din. Sum hmuh/pek tur hi SEBI hnuaia inziak lutin October 2016 aṭanga hman ṭan theih tura buatsaih a ni a; sum hi information technology, ITES, ei tur sawngbawlna, hriselna lam, tourism leh service industry lama company dintute puina tur a ni.