Lawngtlaiah in pakhat a chim

Tun hnaia ruahsûr nasa avangin nimin zing dar 8:45 khan Lawngtlai Chandmary Venga Vannawlthanga in, Assam type, chhungkaw pathum luah lai a chim a, mi pakhat a hliam.

In chimna hmun hi LADC chief executive member VL Hmuaka leh Lawngtlai DC Dr A Muthamma te chuan an tlawh nghal a; sorkar aṭanga chhawmdawlna awm thei turte ngaihtuah a nih tur thu an sawi.

Lawngtlai Chanmary khawtlangin vanduaina tâwkte chhawmdawl hna an thawk nghal a, bial-tu MDC Lalsawmzuala chuan hnatlangte thingpui senso atan Rs. 2,000 a pe.

Thu dawn danin, Lawngtlaia ruahsur nasa vangin khawpui chhung-ah leimin hmuh tur a awm nual a; Lawngtlai-III leh AOC Vengah in pa-hnih pawh leimin vangin din-hmun hlauhawmah a awm mek a ni.