MPC-in khauh zawka ILP kengkawh phût

MPC office bearer-te nimina ṭhu- khawm chuan thuchhuah siamin, Mizote hung tlattu ILP a awm chunga Mizoram chhunga hnam dang ILP nei lo an tam ta lutuk chu an vei thu an tarlang a, "ILP dan kan kengkawh
ṭha lo a nih chuan India sorkarin min paihsak mai ang tih kan hlauthawng," tiin, ILP khauh zawka kengkawh turin sorkar an phût.

MPC OB thuchhuah chuan, Memorandum of Settlement-ah - Mizorama hman mek Inner Line Regulation chu state sorkar ráwn lo chuan paih/ṭhiah a ni lo ang tih chauh a ni tih sawiin, "Min ráwn chuan, kan phal lo chung pawhin an ṭhiat thei tihna a ni. Chuvangin, he dan hi kan neih reng nan khauh taka kenkawh a ṭul," a ti a; a pawimawh ber chu, danin a phût angin Mizorama an lo luh dawnah pass laktir a, pass nei lote chu Mizorama luh phal loh a nih thu a tarlang.

MPC chuan, ILP check-na hmunpui pathum - Lengpui Airport, Bairabi rêl chawlhhmun leh Vairengte police checkgate-ahte duty-te an khauh tâwk lo hle tih sawiin, "Lengpui Airport-ah an check ngai meuh lo a, Bairabi-ah vawiin thlengin an la check lo a, Vairengteah pawisa pein an kaltlang tihte report a awm. Heng hi thil pawi tak a ni," an ti a; ILP chungchangah khauh zawka hma la turin sorkar an phût a ni.