Thenzawl pa thih danah FIR thehlut Farkawn khaw mi pathum man an ni

Lalmalsawma (34) c/o C Lalrintluangi, Thenzawl Venglai, Farkawna khawsa ṭhin chu August 17, 2016 zan dar 10:30 velah a thi a; mi kut a tawrh vanga thi nia hriat a nih avangin FIR thehluh a nih angin, police-te'n Farkawn mi pathum an la tawh.

Thenzawl aṭanga thu dawn danin, August 17 zan dar 10:30 velah Darkawna Lalmalsawma nikhawhreloa a awm chu hmuh a ni a, Farkawn damdawi-in (PHC)-ah dah luh a ni. August 19-ah Aizawl Civil Hospital panpui a ni a, ICU-ah khum ruak a awm loh avangin Synod Hospital ICU-ah dah a nih hnuah, August 21 zing dar 8:15-ah a thi a ni.

Lalmalsawma nikhawhrelova an hmuhna hmun sawi dan inan loh vang te, a pawisa kawl ngei nia hriat Rs. 4,000 chuang a bo avangtein August 19-ah Dungtlang Police Outpost-ah FIR thehluh a ni a; Dungtlang police-te'n an chhui zui nghal a, Lalmalsawma lu-ah hliam a tuar tih an hmu. Synod Hospital thlenpui a nih hnuah a hnungzángah duk cher chur tam tak hmuh chhuah leh a ni bawk.

A chhungte'n mi kut a tuar ngei nia an hriat avangin Bawngkawn Police Station-ah FIR an thehlut leh a; a thih ni, August 21-ah postmortem a ni.

Lalmalsawma thih dan avang hian Dungtlang police-te chuan Farkawn khaw mi pathum chu thu zawhfiah atan an la a, August 21 zan khan Champhai police kutah an hlan. Lalmalsawma ruang hi nimin khan Thenzawl Venglaiah vui a ni.

Lalmalsawma thih chungchangah hian Thenzawl Joint YMA chuan thuchhuah siamin, "Farkawn khuaa misualte'n Lalmalsawma kut an thlak vanga a boral hi pawi kan tiin, kut thlaktute kan dem tak zet a ni," an ti a; pawi khawihtute chu man chhuak a, dan anga na taka hrem an nih theih nan chak taka hma la turin thuneitute an phût tih an tarlang.