Covid-19: Mizoram dinhmun Kai thar Mizo 1, hnam dang 27

September 17, Ningani khan Mizo­ramah Covid-19 vei mi 28 hmuh chhuah a ni a, mipa vek niin, Mizo pakhat tih loh chu hnam dang vek an ni. Nimin khan hripui vei dam tawh mi 24 chhuahtir an ni thung.

Covid-19 vei Ningania hmuh chhuahte chu - ZMC laboratory-a RT-PCR hmanga hmuh mi 18, TrueNAT-PCR hmanga Lunglei Civil Hospital-a hmuh paruk leh Serchhip District Hospital-a hmuh pahnih leh, Rapid Antigen Test (RAT) hmanga hmuh chhuah Aizawl leh Serchhip district-ah pakhat ve ve an ni.

Nimin khan Covid-19 vei zinga dam tawh State Referral Hospital aṭangin mi panga, Tribal Art Centre CCC aṭangin pahnih, Lengpui AYUSH CCC aṭangin pahnih, Thenzawl AYUSH CCC aṭangin pakhat, Kolasib CCC aṭangin pahnih, Serchhip CCC aṭangin 10 leh Hnahthial CCC aṭangin mi pahnih an ni.

Mizorama Covid-19 vei hmuh chhuah tawh mi 1,534-te chu mipa 1,260 leh hmeichhia 274 an ni a; an zinga mi 973 (63.43%) chu chhuahtir an ni tawh a, mi 561 (36.57%) an la chhuak lo. La chhuak lo zingah hripui vei tawh lo, negative tawh an awm nual bawk.

September 17-a ZMC RT-PCR laboratory-a swab sample endik, nimin zinga result chhuak hi 1,123 a ni a; Covid-19 vei hmuh chhuah mi 18-te chu Assam Rifles mi leh sa, kum 25-54 inkar, Zokhawsang quarantine centre-a awm mek an ni. Covid-19 symptom nei an awm lo.

Ningani vek khan TrueNAT-PCR hmangin Lunglei Civil Hospital laboratory-ah hripui vei mi paruk, BSF sipai vek hmuh chhuah a ni a, state dang aṭanga tun hnaia rawn lut, quarantine centre a awm lai an ni. TrueNAT-PCR hmang vêkin Serchhip District Hospital-ah mi pahnih, Assam lam mi, Tantia Constructions-a thawk hmuh chhuah a ni bawk.

RAT hmanga Aizawla hripui vei hmuh chhuah chu Bawngkawna mipa kum 37 mi a ni a, Mizoram chhunga kai chhâwng niin, Covid-19 symptom a nei. Kolasib district-a RAT hmanga Covid-19 positive hmuh chhuah chu Hailakandi, Assam lam mi, truck driver niin, Bairabi entry point-a endik a ni.

Sorkar thuchhuah tarlan danin, September 17-a Mizorama swab sample endik zawng zawng chu 1,613 a ni a; chu'ngte chu ZMC laboratory-a endik 1,127, district panga TrueNAT laboratory-a endik 172 leh, RAT hmanga district pariata endik 314 a ni.