Political party-te'n Remna Ni an hmang

Nimin kha MNF leh India sorkarin inremna thuthlung Memorandum of Settlement an ziahna champha, 'Remna Ni' a ni a, political party-te'n an hmang. India sorkar leh MNF hian June 30, 1986-ah remna an ziak a ni.

Remna Ni hi MNF chuan Aizawla an party pisa, Mizo Hnam Rûnah an hmang a, an party president Zoramthanga chuan Champhaiah a hmanpui. District khawpui hrang hrangah pawh Remna Ni hi an hmang a, Aizawla an headquarters-a hruai­tute'n an hmanpui hlawm a ni.
MNF President chuan, India sorkar leh MNF-in inremna thuthlung an ziah theih chhan chu Pathian vang a nih thu a sawi a, "Remna hi Mizote chuan kan chênchilh a nih avangin a hlutna kan hre tawk lo. Ram páwn aṭanga a zir chiangtute'n Mizo­ram inremna chu mak an tih khawpa hlawhtling a ni," a ti.
Zoramthanga chuan, "In­rem­na man atan India chuan sor­karna a sacrifice a, MNF-in an hma lam hun an risk ve thung," a ti a; inremna thu­thlungah chuan Mizote inrêlbâwlna zawng zawng chu Parliament-ah ni loin, Mizo kutah dah a nih thu a sawi.
Mizo Hnam Runa thu sawitu, MNF vice president Dr R Lal­thang­liana chuan, Mizoram rem­na chu kohhran, tlawmngai pawl, zirlai pawl leh political party-te thawh rah a nih thu sawiin, "MNF-in remna kawng a zawh chhan chu Mizoram mipuite ngenna vang liau liau a ni. Kan pasalṭhate khan ram leh hnam tan beih an la inhuam a, mahse Mizoram mipuite tawrhna dinhmun thlirin, mittui nen an silai an tung a ni,” a ti.
Dr Thangtea chuan, MNF chu an famkim bik lo tih sawiin, "Tihsual tam tak kan nei a, mi rilru tihnat leh hliam tam tak pawh kan nei ang. Mizoram mipui ngaihdamna kan dil a ni," a ti a; sorkarna an chang leh a nih chuan an dik lohnate simin, kalphung thar an kalpui tur thu a sawi.
Congress party chuan Remna Ni hi Vanapa Hall bakah, district khawpui hrang hrangah an hmang. Vanapa Hall-a thu sawitu MPCC president Lal Thanhawla chuan, Mizoramin remna leh muanna a neih theih chhanah tumah thawh hlâwk bik an awm lo tih sawiin, "Mizo mipuite thawh rah a ni," a ti.
Lal Thanhawla chuan, thu dik chanve hmanga mahni hamṭhatna tura dâwt phuahchawp chu a tlo ngai lo tih sawiin, "Mizoramin remna leh muanna a neih theih chhan hi kohhran, tlawmngai pawl, zirlai pawl leh political party hrang hrangte thawh rah a ni. Anni hian remna leh muanna a awm theih nan theihtawp an chhuah ṭheuh," a ti a; remna leh muanna awm chhana thangṭhat lak tum an awm a nih chuan pawmsak mai mai turin an party mite a chah.
Mizoram buai chu politics-a buaina a nih thu sawiin Lal Thanhawla chuan, "Politics-a buaina hi chu sipai leh silai hmanga chinfel chi a ni lo. Inrem lote inbiakremtir a ṭul. Chumi tur chuan Congress party-in theihtawp kan chhuah a ni," a ti.
MPCC President sawi danin, Ch Chhunga chief minister a nih laiin kohhran, political party leh tlawmngai pawlte Aijal Club-ah a kokhawm a; remna leh muanna a awm theihna atana chak zawka hmalak theih a nih beiseiin Mi­zo­ram Peace Advisory Committee din a ni.
Committee hian remna leh muanna a awm theih nan theihtawpin an bei a, an hotu ṭhenkhat chu jail-ah an tàn phah a; remna a awm theihna turin hun a duh rei hle a, a kawng pawh a khirhkhân hle a ni.
Lal Thanhawla chuan, remna leh muanna a awm theihna turin mi hrang hrangin lal ṭhutthleng a kian lo nia an sawi ṭhin chu a dik tih a sawi rualin, "Lalṭhuthleng kha kian lo ila chuan kum 1986 khan inremna an ziah erawh ka ring lo," a ti.