KHAWTHLIR

Environment Awareness nei
Green Mizoram Network (GMN) chuan nimin khan Remna Ni pualin Kolasib-ah Environment Awareness Campaign an buatsaih a, MLA PC Zoram Sangliana’n a hmanpui. Awareness campaign neih zawhah Green Mizoram Day-a an thing phun tawh hung ṭhat hnatlan an neih bakah, thing ṭiak ṭhahnem tak an phun belh bawk.

Thisen pe
Hnahthial Bazar Branch YMA chuan, nimin khan an veng YMA Hall-ah blood donation camp an huaihawt a, Lunglei Civil Hospital tan thisen unit 46 an pe a, a petute mipa 35 leh hmeichhia 11 an ni.

NLUP sem
Horticulture department chuan nimin khan Kolasib-ah NLUP third phase leh fourth phase-a kuhva leh serthlum thlangtute hnenah kuhva ṭiak leh serthlum ṭiak an sem. Kolasib district-ah hian kuminah kuhva ṭiak 1,97,150 leh ser-thlum ṭiak 4,337 sem an tum. Nimin vek khan Kawlkulhah Soil & Water Conservation department-in Kawlkulh, Vankal, Chhawrtui leh Vanchengpui khuaa hmunphiah thlangtu mi 40 hnenah ṭanpuina Rs. 26,600 ṭheuh an sem.

Lawngtlaiah Leimin enfiah
Lawngtlai DC J Hming­thanmawia chuan, tun hnaia ruahsur vanga Lawngtlai-III huam chhunga Zoram Drivers Union (ZDU) office sak mek chhaka kopang min vanga harsatna awmte a enfiah.

Zirlai chawimawi
Sialhawk Students` Union chuan June 29, 2015 khan an huam chhunga zirlai tiṭhate chawimawina hun an buatsaih a, RMSA deputy DPC Hualrikhuma'n a hmanpui.

Kawng zawh
Thingdawl Joint MHIP huaihawtin Thingdawl khaw chhunga hmeichhiate chuan, an khuaa hmeichhe chunga hleilenna thleng ṭhin duh loh lantirna atan kawng an zawh.