KHAWTHLIR

ZPM Ṭhalai president Malsawmzuala leh hruaitu dang ṭhenkhatte chuan nimin khan Aizawl South-ll bial chhunga veng ṭhenkhata local task force-te hnenah ṭanpuina pawisa a hlân. Aizawl South-II bialah Covid-19 vei eng emaw zat an awm avangin veng hrang hrangah harsatna tâwk an awm a, an veng dinhmun hriat chian lehzual theih nan ZPM Ṭhalai President hian a tlawh kual a; Venghnuai LTF, Salem Veng LTF, ITI Mualpui LTF leh ITI Veng LTF hnenah Rs. 5,000 ṭheuh a hlân a ni.

MZP Headquarters, Mamit chuan thuchhuah siamin, Mamit district-in zirna lamah hmasawnna a hmu zel chu lawmawm an tih thu leh, zirlai exam neite'n buaina leh harsatna awm loa exam an hmachhawn thei chu lawmawm an tih thu an tarlang. Mizoram sorkarin Mamit College-ah Geography subject a dah thar ta chu lawmawm an tih thu an sawi bawk.

Champhaia District Sports & Youth office buatsaihin nimin khan Champhai District Hospital blood bank-ah blood donation camp buatsaih a ni a, mipa 74-te'n thisen an pe.

Chalrang khawtlang chuan an khuaa nupa reka khawsa, kum 70 chuang ve ve tawh, ram hna thawk thei tawh lo te chu September 25, 2020 aṭang khan in an saksak a, nimin khan an sa zo. In hi a dung ft. 24 leh a vâng ft. 12-a zauin an sa a, an sak chhung hian thâ 320 vel an séng a, bialtu MLA Tawnluia, deputy chief minister-in in chung tur rângva a tum. Chalrang khua hi Khawzawl district-a awm a ni.

State Referral Hospital-ah nimin khan Covid-19 vei mi pahnih leh vei rinhlelh mi pahnih dah luh an ni a, anni nen hian SRH-ah hripui vei vangin mi 85 enkawl mek a ni. SRH-ZMC Bulletin tarlan danin, mi 85 zinga pakhat chu ICU-ah awmin, ngaihtuahawm a ni lo a; Isolation Ward-a awm mi 83 leh SICU-a awm mi pahnihte'n harsatna an nei lo.

Champhai DC Maria CT Zuali chuan nimin khan an district-a khaw pathum - Tualchéng, Lungphunlian leh Hnahlan khuate a tlawh a, khawtlang hruaitute nen inkâwmin, khawtlang hmasawnna atana hmachhawpte leh hmalak dan turte a sawipui. DC chuan, Champhai district-a khuate a theih anga tam tlawh a tum thu sawiin, "Hmasawnna rualkhai, mi tin thleng phak siam tum a ni," a ti a; khawtlang mamawh leh harsatna a hnena an thlente chu a ṭul ang zela bawhzui zel a tum thu a sawi bawk.

Serchhip District Task Force on Covid-19 chu nimin khan an chairman Kumar Abhishek, bawrhsap hoin DC meeting hall-ah an ṭhukhawm a; village council thlan tharte tana SIRD-PR kaltlanga foundation training buatsaih dan tur an ngaihtuah. Bawrhsap chuan, 15th Finance Commission aṭanga VC-te'n sum an dawn dan leh a hman dan tur te, ni 100 inhlawhna kalpui dan turte leh sorkar hmalaknate chu VC member tharte'n an hriat chian thuai a ṭul thu a sawi.