Mizorama thil man punna Kum tawp lamah a tlahniam

Kum 2014 chhunga Mizorama thil man punna (inflation rate) chu 8.92% a ni. January thlaah thil man punna a sang ber a, December thlaah a punna a hniam ber thung.

Economics & Statistics department-in June 29, 2015-a an tihchhuah tâk, Price Trends in Mizoram 2014-in a tarlan danin, Mizorama thil man punna rate hi kum 2014-ah chuan kum tir aṭangin kawp tawp lamah a hniam zawngin a kal a, kum 2012 leh 2013-ah erawh chuan kum tawp lamah inflation rate a sang tial tiala ngaih theih a ni.

Kum 2014 bikah chuan, kum tir lam thla thum chhung chu 12% chunglam vek a nih bakah, April-ah pawh 10% chung lam a la ni a; kum tìr lama inflation rate a sàn chhan hi chaw lam (food item)-te leh in lam chite leh vaihlo aṭanga siam chhuahte man a pun nasat vang a nih thu Price Trends in Mizoram 2014 chuan a tarlang.

January-March chhungin a pung nasa ber a, ei tur lam chi bika inflation rate phei chu 18% vel a ni.

Kum tàwp lam, November leh December thlaah erawh chuan inflation rate a hniam hle thung a, November-ah 4.96% leh December-ah 3.97% a ni. Kum tawp lama inflation a hniam chhan hi thawmhnaw, mutbu lam leh pheikhawk lam chi (footwear) man a tlakhniam vang a nih thu an tarlang.