Remna hi mipui nawr chhuah a ni: Duhoma

ZNP chuan nimin khan an pisaah Remna Ni an hmang. ZNP president Lalduhoma chuan, Mizorama remna chu mipuite, a bik takin zirlaite nawr chhuah a nih thu a sawi.

Lalduhoma sawi danin, Mizo­ram pumin haw hawin remna an nawr a, zirlai pawl huaihawtin June 23, 1986-ah Secretariat kawtah chhun-zan zawmin remna duhin mipui leh zirlaite'n chaw an nghei a ni. Mi tam tak man an ni a, ni li leh zan li chaw nghei a nih hnuah minister bangla zawng zawng hual tum a ni a, minister office kal ngam leh páwna chhuak ngam an awm lo.

ZNP President chuan, remna siam a nih loh chuan Mizoram sorkar chu namthlûk a ni tho tho dawn tih a chian avangin loh theih lohin June 30, 1986-ah Mizoramin remna a nei ta niin a sawi.

ZNP-in Remna Ni puala in­khawm an hman hi an vice presi­dent K Liantlinga'n a kaihruai a; rambuai vanga nunna chánte sûnna hun an hman bakah, an president Lalduhoma chu 'Remna palai' tia vuah­in chawimawina parṭhi an hlan a ni.

ZNP party hian district khaw­pui dangah pawh Remna Ni an hmang bawk.