Synod-in kohhran hruaitute ko khawm

Mizoram Synod chuan nimin khan khawpui parukah, ‘Kohhran hmathlir chung-changa inrâwn khawmna’ a buatsaih a; kohhran kal zel dan tur an sawiho.

Inràwn khawmna hi Aizawl district-a mite tan Mission Veng Kohhran biak-inah, Champhai district tan Champhai Veng­thlang Kohhranah, Kolasib district tan Kolasib Diakkawn Kohhranah, Mamit district tan Mamit Kohhranah, Serchhip district tan Serchhip Kawnpui Kohhranah leh, Chhim Bial (Lunglei, Lawngtlai leh Saiha district) tan Lunglei Chanmari Kohhran biak-inahte neih a ni.

District chhunga pastor/minister leh probationary pastor te, Synod Executive Committee member te, district chhunga tualchhung kohhran tin aiawh pakhat ṭheuh leh thlengtu kohhran committee member-te tel tura tih an ni a; Aizawl district bikah chuan Synod secretary (senior) Rev. B Sangthanga’n kaihruaiin, mi 590 an tel.

Lungleiah mi 166, Champhaiah mi 241, Serchhipah mi 144, Kolasib-ah mi 138 leh Mamitah mi 144 an tel.

Inràwn khawmnaah hian pastor bial ṭhen leh bial khata kohhran awm zat tura duh dan te, inkhawm kalpui dan tihdang­lam a ṭul leh ṭul loh te, sum lama inhrêk a ṭul leh ṭul loh leh inhrêk dan tur te, kohhran indan chungchang te, Synod Office inrêlbâwl dan chungchangte leh thil dangte an sawiho a ni.