Strawberry aṭangin Rs. 19,77,980 lei

Saiha Horticulture Division hnuaia strawberry chíngtute'n November 2014 aṭanga May 2015 chhung khan an hralhna aṭangin Rs. 19,77,980 an hmu chhuak.

Zawhna chhangin Sai­haa Horticulture officer CH Lalmuanpuia chuan, Saiha aṭanga km. 10-a hla, Niawhtlang-III ah kum 2014 aṭangin Mission for Integrated Development of Horticulture (MIDH) hnuai­ah strawberry (sweet charlie) an chìntir thu leh, tunah hian chhungkaw 18-in eizawn nan an hman thu a sawi.

Lalmuanpuia chuan, strawberry chìn chu eizawnna tlak a nih thu sawiin, hectare 20-a zauah chìn mek a nih thu a sawi a; kum 2015–2016 chhungin Niawhtlang I, II leh III, Siata, Chakhang, Chapuiahte hectare 60-a zauah hma thar an lak dawn thu a sawi bawk.

July 2014-a an phun ṭan chu November 2014 aṭangin an hralh ṭan a, May 2015 thlenga chhungkaw 18-in an hralhna aṭanga sum an lak luh zat chu Rs. 19,77,980 a ni. Strawberry-te chu Saiha bakah, Lawngtlai, Lunglei leh Aizawlahte an hral ṭhin.

Saiha DHO sawi dan­in, Horticulture department-in strawberry chíngtute chu a chìnna hmanrua, leiṭha, Mul­ching film, Punets, tuilakna, tuizem leh ṭul dang­tein a ṭanpui ṭhin a ni.