Digital Indian Week hmang ṭan dawn

Tunlai thiamna mipuite'n an hman ṭangkai theihna tur atana ruahman, 'Digital Indian Week' chu vawiin hian India ram hmun hrang hrangah hman ṭan a ni dawn a, Mizoramah chuan naktukah hman ṭan a ni ang.

Information & Communication Technology (ICT) secretary C Lalhmachhuana chuan nimin khan Aizawl Press Club-ah thuthar thehdarhtute kawmin 'Digital Indian Week' hman a nih tur chhan leh hman a nih dan tur a sawifiah.

Lalhmachhuana sawi danin, Digital Indian Week in a tum ber chu India khua leh tuite tunlai thiamna hmang ṭangkai thei tur khawp chher chhuah a, an thiamna hmanga India ram kalphung thara kal tir a ni.

India ram hi tun atan mai ni lo, kum lo la awm lehzel tura hma a sawn theih nana ruahmanna a ni. Hei hi kum hnih khat lek thil tur a ni lo. India hmasawnna rahbi tharah tunlai thiamna hi hmun pawimawh chantir a tum tlat a ni.

Digital Indian Week-ah hian July 3-ah Mizoram Journalist Association member-te tan IPR Auditorium-ah workshop buatsaih a ni dawn a; July 4, Inrinni zingah Digital India Marathon buatsaih a ni ang. Marathon-ah hian a duh apiang tel theih a ni a, zing dar 6-ah ṭan tur niin, Sikulpuikawn aṭangin Chanmari kawn hêl tur a ni a, a tiṭhate tan lawmman siam a ni.

July 6-ah Hackathon leh Senhri­Hack Competition buatsaih a ni dawn a, a duh apiang tel theih niin, lawmman a awm. Hre chiang duh tan diw.mizoram.gov.in-ah en theih a ni. July 7-ah Digital India nWeek chu IPR Auditorium-ah khar a ni ang.

ICT Secretary chuan, Mizoram khaw 136-ah Common Service Centre (CSC) bun a nih tawh thu leh, khaw 250-ah Rural Information Kiosk (RIK) din a nih tawh thu a sawi a, "CSC leh RIK hmang hian mipuite'n awlsam zawkin an khua aṭangin sorkar an dàwr thei a, changtlung zawk leh ṭha zawk tura hmalak mek zel a ni," a ti.