Inremna thuthlung ennawntu tur din turin PAMRA-in sorkar ngen

Peace Accord MNF Returnee Association (PAMRA) chuan nimina Remna Ni an hmang a; resolution pass-in, 'Mizoram sorkar hian Review Committee on Memorandum of Settlement (Peace Accord) 1989' din turin sorkarin hma la rawh se, an ti.

PAMRA hruaitute chuan nimina Remna Ni an hman zawhah Aizawl Press Club-ah thuthar thehdarhtute an kâwm a; hnam sipaite dinhmun nia an sawite an tarlang.

PAMRA hruaitute chuan, kum 1986-a inremna siam a nih hnuah ramhnuai aṭanga an lo chhuahin Maumualah ram pek an ni a, mahse tun thlengin in sak theih lohna hmun a la nih thu an sawi a, "In hmun pawh fel lo hian engtin nge in kan sak thei ang," an ti.

PAMRA sawi danin, kum 1987 khan in sakna atan sorkar laipuiin mi pakhat tan Rs. 30,000, Mizoram sorkar hnenah a pe a, mahse a dawng turte'n Rs. 10,000 chiah an la dawng. Kum 1995-ah Rs. 10,000 ṭheuh an dawng leh a ni.

Inremna thuthlung ang chuan, sorkarin eizawnna a ngaihtuahsak tur a nih thu sawiin PAMRA hruaitute chuan, "Mi tam ber eizawnna siamsak kan la nih loh avangin kum 2007 khan chaw kan nghei phah hial a ni," an ti.