Sorkar hotute leh pawl hotute'n hripui vei dam tawhte chhuahtir dan tur sawiho

Nimin khan SAD confe­rence hall-ah Health & Family Welfare minister Dr R Lalthangliana hoin sorkar hotute leh pawl ṭhenkhat hruaitute'n Covid-19 vei, dam tawhte chhuahtir dan chungchanga ruahmanna siamte an sawiho a, 'Dis­charge Protocol for COVID-19 Patients at CCC and above in Mizoram' tih chu tihpuitlin thuai an rél niin sorkar thuchhuahin a tarlang.

Ṭhutkhawmah hian Covid-19 veite enkawlna hmun hrang hrang aṭanga dam tawhte chhuahtir dan tura ruahmanna, 'Discharge Protocol for COVID-19 Patients at CCC and above in Mizoram' te, kohhran/khawtlang hmuna CCC siam tur - Community Covid Care Centre (CCCC) chungchanga kaihhruaina te, contact tracing aṭanga swab sample endik leh inkhung hranna chungchanga rawtnate sawiho a ni.

Sorkar thuchhuah tarlan danin, Discharge Protocol for COVID-19 Patients at CCC and above in Mizoram tihah hian Covid-19 vei zinga natna lang chhuak lo leh natna lang chhuakte chhuahtir dan tur te, hripui vei damlo (severe, critical & immuno-compromised case)-te chhuahtir dan tur ruahmannate a tel.

Hripui veiin a kài chhàwn theihte chhuina (contact tracing) aṭanga swab sample test chungchang leh inkhung hran chhunzawm dan tura rawtna thar awmte an sawiho a; swab test turte chu primary high risk contact, primary low risk contact leh secondary contact-ahte thliar dan tur leh sample lâk ngai tur chin rawtnate a awm.

"Rawtna chi hrang hrangte chu uluk takin an thlir a, siamrem ngai lai, belh leh paih ngaite bakah, ennawn leh ngaite an thliar hrang a, mi zawng zawng tana pawimawh a nih avangin fimkhur taka ngaihtuahna séng a, a rang thei ang bera tipuitling turin an rêl a ni," sorkar thuchhuah chuan a ti.

Ṭhutkhawmah hian Medical Operation Team on Covid-19 leader Dr ZR Thiamsanga, MLA te, Joint NGO Coordination Committee, Mizoram Kohhran Hruaitu Committee (MKHC), Indian Medical Association leh Non-Governmental Hospital Association of Mizoram (NGHAM) hruaitute leh sorkar official-te an tel a ni.

Dr R Lalthangliana chuan, Covid-19 chu khawvelin a hriatthiam dan a inthlâk reng tih sawiin, "Mithiamte'n uluk takin research neiin an zir reng a, ngaihdan leh pawm dan pawh a danglam ṭhin avangin kan hriatthiam dan ang zelin mipui tana him thei tur ang berin inkaihhruaina leh kalphung her rem zel a ngai ṭhin," a ti. Private hospital-te'n TrueNAT laboratory an neih ve theih dan tur leh Rapid Antigen Test an kalpui dan tur pawh sorkarin chak taka a bawhzui zel thu a sawi bawk.