Congress-in sorkar thâ tihchak tumin vênpui hna a thawk - MPCC

Mizoram Pradesh Congress Committee (MPCC) chuan nimin khan thuchhuah siamin, hripui léng donaah Congress party-in sorkar thâ tihchak tumin nasa takin vênpui hna an thawk niin an tarlang.

MPCC chuan, hripui dona chungchangah sorkar chêt pelhna lai te, sorkarin a tih tur a tih lohte leh chak zawka a kal theihna lai turte an tarlang ṭhin nia sawiin, "Hripui léng karah hian opposition party kan nih anga kan tih tur kan ti a, a theih ang anga sorkar thawhpui a, a chak lohna lai tihchak tumin hma kan la reng a ni," an ti.

Congress party chuan MNF kaihhruai sorkar thawhpui an tumnate hlawhtling vek thei lo mah se, kalphung dik lo siamṭhat tuma an beihna avangin sorkar pawh a insiamṭhat phah hlea an hriat thu an sawi a, "Sorkar thâ tichak lehzual turin Congress party hruaitute leh MLA te, AMC councillor-te kaltlangin ṭanpuina thilpek tam tak kan pe chhuak tawh a ni," tiin, Congress party mite'n ṭanpuina an pek dan an tarlang.

Congress MLA leh leh hotu dangte hmalaknate chu hripui donaa sorkar thâ tihchakna tur leh mipui him zawkna tura tih vek an nih thu sawiin MPCC chuan, "Sorkar hi ṭanpui kan duh a, a theih ang angin mahni hmazawnah kan che nasa hle. Hripui donaah hian sorkar hian opposition MLA-te en hrang tawh lo se, thurualpuiin, rorelna pawimawhah telh ve ṭhin se, tun ai hian mipui kan ṭangrual lehzual theiin a rinawm," an ti.

MPCC chuan, Mizoramah Covid-19 vei mi 1,534 hmuh chhuah a ni tawh chu pawi an tih thu an tarlang a; hripui vei dama chhuak tawhte an lawmpui thu sawiin, enkawl laite pawh dam thuai tur leh test result nghak laite chu an result a ṭhat theih nan duhsakna an hlân a ni.

1.    MLA pali - Zodintluanga, C Ngunlianchunga, Nihar Kanti Chakma leh KT Rokhaw bakah, councillor Rosiamngheta ten ambulance pasarih an pe tawh; Aizawlah pathum, Lunglei, Siaha, Lawngtlai leh Tlabungah pakhat ṭheuh.

2.    Congress MLA pangate'n May 2020-a an hlawhpui (basic pay) Rs. 80,000 ṭheuh, a vaiin Rs. 4,00,000 chu CM Relief Fund-ah an thawh.

3.    MLA Zodintluanga Ralte-in Lunglei Civil Hospital tan RT-PCR khawl a pe.

4.    Ronald Sapa Tlau-in MP a nih laiin MP fund Rs. 5,00,000 CM Relief Fund-ah a thawh; 75% a lut tawh a, 25% dang pawh pek mai theih turin DC office-ah chinfel mek a ni.

5.    MLA Lalrindika Ralte-in ama sum Rs. 2,00,000 volunteer-te lawmman atan a thawh.

6.    Quarantine centre eng emaw zatah MPYCC president Dr Lalmalsawma'n free wifi a pe a, volunteer-te lawmman tur a pe a, damdawi leh hmanrua tam tak a sem bawk.

7.    Congress MLA-te leh party hruaitute'n ramria duty-te tlawh kualin, ṭanpuina pawisa leh hmanruate an pe.

8.    Damdawi leh hmanrua tam tham tak Congress party hruaitu eng emaw zatin an sem chhuak tawh.