Dawhthei taka result nghâk turin ngen

Zoram Medical College (ZMC) chuan, tun hnaiah swab sample endik tur a tam avangin dawhthei taka test result lo nghak hrâm hrâm turin mipui an ngen.

ZMC chuan SRH-ZMC Covid-19 Bulletin kaltlangin nimin khan ngenna an tichhuak a; ZMC-a swab sample endik ṭan ní, April 7, 2020 aṭanga September 17 thleng khan swab sample 52,167 endik a ni tawh tih tarlangin, "India rama ICMR accredited Covid-19 laboratory-te endik (monitor) reng a ni a, ZMC Covid-19 lab. pawh ICMR-in a endik reng a ni. Tunah sample backlog a awm leh tâk avangin dawhthei taka result lo nghak turin kan inngen e," an ti.

Tun hnaiah sample endik tur a pun nasat avangin sample latu te, laboratory-a endiktute leh result buaipuitute an hah hle tih tarlangin ZMC chuan, "Ni danga result ni hnih khata chhuak mai ṭhin kha tun hnaiah chuan ni li/nga dáwn nghah ngaite a awm ta a ni," an ti a; an harsatnate hrethiama nghak hram hram turin task force-te leh mipui an ngen.

SRH-ZMC Bulletin chuan, sample test result nghaktute'n an phone number dik taka an ziak a nih chuan result a chhuah veleh SMS hmangin hriattir ṭhin an nih avangin, sample lâk zawh vela result buaipuia zâwt buai rih lo turin mipui an ngen tih a tarlang bawk.